Tags-Dil

dil-soḳhta the chāhne vāloñ meñ tumhāre
lekin sabab-e-garmī-e-bāzār hamīñ the

ThanDe kiye ġhairoñ ke dil aur ham ko jalāyā
ik the to mohabbat ke gunahgār hamīñ the

milte hī lab-e-yār se lab dil nikal aayā
maarā jise iisā ne vo bīmār hamīñ the

sab raaz ta.ashshuq'' se bayāñ hote the dil ke
pahle tire ik mahram-e-asrār hamīñ the

chalte haiñ dene ko ham jise dil vo hañs ke le le bas ab hameñ to
yahī hai ḳhvāhish yahī tamannā yahī hai maqsad yahī hai matlab

āñkhoñ kī tarah dil bhī barābar rahe kaḌve
in tañg makānoñ meñ dhuāñ jam sā gayā hai

nazr-e-dil māñgtī haiñ aap kī sarshār āñkheñ
ain mastī meñ rahā kartī haiñ hoshiyār āñkheñ

taak lete haiñ nazar-bāz haiñ ham bhī sāhab
dil churāyā hai churāte ho jo har baar āñkheñ

murġh-e-dil us se kisī tarah nahīñ bach saktā
kahīñ shāhīn shikārī sī haiñ tayyār āñkheñ

ye soch ke uThnā har din tum is dil kā phuul khilegā zarūr
is aas pe sonā ab kī shab koī ḳhvāb nirālā aa.egā

ai rāh-e-suḳhan ke rāh-ravo dil-shād raho is raah meñ bhī
ḳhushbū kī savārī Thahregī rañgoñ kā piyāla aa.egā

hama-tan jalvā-fishāñ māh-o-charāġhāñ kī tarah
kaun aayā dil-e-pur-shauq meñ mehmāñ kī tarah

zehn-e-fankār meñ mānind-e-shu.ūr-e-naġhma
safha-e-dil pe hai vo nazm ke unvāñ kī tarah

zabt bhī sabr bhī imkān meñ sab kuchh hai magar
pahle kam-baḳht mirā dil to mirā dil ho jaa.e

saroñ pe dhuup to āñkhoñ meñ ḳhvāb patthar ke
vo sañg-dil the so utre azaab patthar ke

zamīn-e-dil pe boyā karb us ne
maiñ samjhā thā ki dildārī karegā

utārūñgā ye poshāk-e-siyah kab
ye dil kab tak azā-dārī karegā

zamīn-e-dil ye jam jaane se kuchh hāsil nahīñ hogā
ġhubār-e-shauq se kah do zarā parvāz tak aa.e

jo zaḳhm-e-dil ko rafū kar rahā thā ashkoñ se
hamāre ba.ad na dekhā gayā kisī ke qarīb

ye kis ke naam se baḌhtī haiñ dhaḌkaneñ dil kī
ye kaun hai mire ehsās-e-zindagī ke qarīb