Tags-Dil

hamāre lahje kī larzishoñ se samajh sako to samajh bhī jaao
tumhāre ġham se lage jo dil pe vo saare tamġhe bulā rahe haiñ

yahī haal hai ka.ī saal se na qarār-e-dil na sukūn-e-jāñ
kabhī saañs ġham kī ulaT ga.ī kabhī rishta dard se kaT gayā

fikr kyā surḳh-rū ho yā TuuTe
dil mirā un kī dekh-bhāl meñ hai

dil kī baat laboñ par lā kar ab tak ham dukh sahte haiñ
ham ne sunā thā is bastī meñ dil vaale bhī rahte haiñ

dil bujhā bujhā tishnagī kī aañch
ajnabī thakan zindagī kī aañch

aap ke paañv ke nīche dil hai
ik zarā aap ko zahmat hogī

har nafas utnī hī lau degā 'sirāj'
jitnī jis dil meñ harārat hogī

vahī bante haiñ baa.is dosto betābī-e-dil kā
mohabbat meñ jo nazdīk-e-rag-e-jāñ hote jaate haiñ

matā-e-dil jinheñ sauñpī thī maiñ ne rāh-e-ulfat meñ
ta.ajjub hai vahī ġhārat-gar-e-jāñ hote jaate haiñ

dabistān-e-mohabbat meñ ik aisā daur aatā hai
ki aurāq-e-kitāb-e-dil pareshāñ hote jaate haiñ

asar bād-e-fanā hone lagā hai jazba-e-dil kā
vo mujh ko dafn kar ke ab pashemāñ hote jaate haiñ

kāġhaz kā ik chāñd lagā kar raat añdherī khiḌkī par
dil meñ kitne ḳhush the apnī furqat kī ārā.ish par

dil kā hujra kitnī baar ujḌā bhī aur basāyā bhī
saarī umr kahāñ Thahrā hai koī ek rihā.ish par

dil kī galiyoñ se guzartā hai zamāna koī
fikr-e-shā.ir meñ koī raat mahak jaatī hai

yārab mire dil meñ hai ujālā terā
ā.īne kī hai baġhal meñ jalvā terā

āḳhir taḌap taḌap ke ye ḳhāmosh ho gayā
dil ko sukūn mil hī gayā iztirāb meñ

vo shai ki jis ne dhuāñ dil meñ mere phailāyā
nishān us kā na kuchh duur tak dhuāñ meñ milā

sukūñ un ko nahīñ miltā kabhī pardes jā kar bhī
jinheñ apne vatan se dil lagā kar kuchh nahiñ miltā

faqat tum se hī kartā huuñ maiñ saarī raaz kī bāteñ
har ik ko dāstān-e-dil sunā kar kuchh nahīñ miltā

merī havas ko aish-e-do-ālam bhī thā qubūl
terā karam ki tū ne diyā dil dukhā huā