Tags-Dil

mirā naam 'darshan'-e-ḳhasta-tan mire dil meñ koī hai zau-fagan
maiñ huuñ gum kisī kī talāsh meñ mujhe DhūñDhtā koī aur hai

sab ko dil ke daaġh dikhā.e ek tujhī ko dikhā na sake
terā dāman duur nahīñ thā haath hamīñ phailā na sake

nā tujh se kuchh ham ko nisbat nā tujh ko kuchh ham se kaam
ham ko ye mālūm thā lekin dil ko ye samjhā na sake

dil-dahī kā to koī sāmāñ kar
dilrubā.ī agar nahīñ aatī

dil ko de kar fareb-e-shauq-o-talab
ab tamannā nazar nahīñ aatī

ālam-e-be-dilī se bhī yārab
dil kī koī ḳhabar nahīñ aatī

dard dil meñ agar na ho ham-dam
shā.irī umr-bhar nahīñ aatī

aah vo ārzū-e-dil 'sāhir'
tā-qayāmat jo bar nahīñ aatī

muqīm-e-dil haiñ vo armān jo puure nahīñ hote
ye vo ābād ghar hai jis kī vīrānī nahīñ jaatī

kāfir tujhe allāh ne sūrat to parī dī
par haif tire dil meñ mohabbat na zarī dī

dil de ke kiyā ham ne tirī zulf kā saudā
ik aap balā apne liye mol ḳharīdī

sach hai umr bhar kis kā kaun saath detā hai
ġham bhī ho gayā ruḳhsat dil ko chhoḌ kar tanhā

ai 'shu.ūr' is ghar meñ is bhare-pure ghar meñ
tujh sā zinda-dil tanhā aur is qadar tanhā

dil dhaḌaktā hai sar-e-shām ki guzregā abhī
vādi-e-shab se koī naġhma-sarā āvāra

tan-e-ba-band-e-havas dar nadāda rakhte haiñ
dil-e-z-kār-e-jahāñ ūftāda rakhte haiñ

ba-rañg-e-sāya hameñ bandagī meñ hai taslīm
ki dāġh-e-dil ba-jabīn-e-kushāda rakhte haiñ

muāf-e-be-hūda-goī haiñ nāsehān-e-azīz
dil-e-ba-dast-e-nigāre nadāda rakhte haiñ

tum se vajūd hai mirā harkat-e-qalb ho tumhī
quvvat-e-zehn-o-dil ho tum ruuh kī tāzgī ho tum

aaj to ai dil tark-e-ta.alluq par tum ḳhush ho
kal ke pachhtāve ko bhī imkān meñ rakhnā

dil ke guchchhe meñ haiñ saare mausamoñ kī chābiyāñ
dhuup kholo chāñdnī chhiTkāo barsāteñ karo