Tags-Dil

kisī ke dil meñ gunjā.ish nahīñ vo bār-e-hastī hoñ
lahad ko bhī mirī miTTī girāñ ma.alūm hotī hai

na kyuuñ 'sīmāb' mujh ko qadr ho vīrāni-e-dil kī
ye buniyād-e-nashāt-e-do-jahāñ ma.alūm hotī hai

dil ko tumhāre rañj kī parvā bahut rahī
talḳhī-e-ishq ab ke gavārā bahut rahī

dil ke varaq pe saaf likhī thī jo ek satr
kāġhaz pe aa ga.ī to burīda bahut rahī

bas ek zaḳhm sauñp ke mujh se kiyā gurez
dil ko to us mizha se tamannā bahut rahī

phūñk de ātish-e-dil daaġh mire
us kī ḳhū yaad dilāte haiñ mujhe

har chand ki hālāt muāfiq nahīñ phir bhī
dil terī taraf-dārī meñ saffāk vahī hai

dilrubā.ī ke ye andāz ġhazab haiñ tere
ki havas-pesha ḳharīdār bane baiThe haiñ

kal raat mire dil ne phir chupke se pūchhā hai
'muztar' tirī aahoñ meñ aa.egā asar kab tak

khul kar baras hī jaa.eñ ki ThanDī ho dil kī aag
kab tak ḳhalā meñ paañv jamā.e raheñge ham

maiñ huuñ majbūr apne dil se mujh ko
parāyā ġham bhī apnā ġham lage hai

chāndnī ḳhāmushī aur āḳhir shab
aa ki hai vaqt dil lagāne kā

rah ga.e ban ke ham sarāpā ġham
ye natīja hai dil lagāne kā

dil vo hai ki jis se chaah nikle
muñh vo hai ki jis se aah nikle

uubā duniyā kī har shai se
dil āḳhir banjāra niklā

palTe dil ke safhe saare
sab par naam tumhārā niklā

harīm-e-dil se nikal aañkh ke sarāb meñ aa
mirī tarah kabhī maidān-e-iztirāb meñ aa

dayār-e-dil kā añdherā agar chhaTā 'sājid'
to dhyān jā.egā us sham-e-avvalīñ kī taraf

ye havas ke bande haiñ nāsehā na samajh sake mirā mudda.ā
mujhe pyaar hai kisī aur se mirā dil-rubā koī aur hai

mirā zauq-e-sajda hai zāhirī ki hai kashmakash mirī zindagī
ye gumān dil meñ rahā sadā mirā mudda.ā koī aur hai