Tags-Dil

māyūsiyoñ ne chhīn liye dil ke valvale
vo bhī nashāt-e-rūh kā sāmāñ na kar sake

dil kī duniyā meñ aa gayā koī
dard ban kar samā gayā koī

apne afkār liye pahlū-nashīñ ho ke rahā
dil se darvesh ne duniyā tirī apnā.ī nahīñ

us baat kā koī rañj nahīñ ham us kī tavajjoh pā na sake
afsos hameñ bas itnā hai ham dil kā haal chhupā na sake

dil ik ziddī bachche kī tarah 'shahzād' se bigḌā baiThā hai
juz ik nārāz se patthar ke koī aur use bahlā na sake

fareb-e-sharh-e-tamannā bhī khā le ab ye dil
laboñ ko jur.at-e-iz.hār-e-mudda.ā de do

ye dil to dushman-e-jānī hai ek muddat se
jo ġham-navāz ho aisā ġham-āshnā de do

mere dil kī dhamāl meñ mujhe dekh
mere sur merī taal meñ mujhe mil

kise apnā kah ke pukāriye kise dil ke ghar meñ utāriye
vo jo pyaar naam kā vasf thā ḳhū-e-ādmī se nikal gayā

kahīñ bāhar apne vajūd ke na hai jot koī na nuur hai
jise apne dil meñ ziyā milī vahī tīrgī se nikal gayā

dil ke ḳhāne meñ kashish ḳhuub milī hai raushan
us kī mahfil kā samāñ rashk-e-jināñ ho ki na ho

dard-mandī kī fazā ham to kareñge qaa.em
sehn-e-dil-dār liye aks-e-fuġhāñ ho ki na ho

vafā ke raaz se parda nahīñ uThā.ūñgī
maiñ dil ke zaḳhm tah-e-dil se hī chhupā.ūñgī

udaas dil ho to gulshan bhī aah bhartā hai
ye sach hai rote hue dil se muskurā.ūñgī

jo mujh pe guzrī hai ashkoñ se vo ibārat hai
jo naqsh dil meñ hai kaise use miTā.ūñgī

jo mere dil kī sadā hī na sun sakā to phir
use maiñ nauha-e-dil kis tarah sunā.ūñgī

tumhārā saath muqaddar meñ gar nahīñ hai likhā
to yaad ban ke maiñ dil meñ kahīñ samā.ūñgī

jo ḳhvāb dekhe haiñ dil un se kyuuñ ulajhtā hai
maiñ ab ye falsafa shāyad samajh na pā.ūñgī

tire na aane se dil bhī nahīñ dukhā shāyad
vagarna kyā maiñ sar-e-shām sone vaalā thā

zalzale sab dil ke andar ho ga.e
hādse rūmān-parvar ho ga.e