Tags-Dil

tujh se mil kar bhī udāsī nahīñ jaatī dil kī
tū nahīñ aur koī merī kamī ho jaise

dimāġh Thiik hai lekin ye dil vabālī hai
na jaane kaun ghaḌī kyā vabāl karne lage

maiñ ḳhush huā thā use dekh kar magar 'azbar'
darūn-e-dil koī purze malāl karne lage

dastak huī to sar pe dupaTTā sambhal gayā
chhoTā sā ik charāġh mire dil meñ jal gayā

tū nahīñ hai to tire hijr kī vahshat hī sahī
ki ye vahshat hī mire dil kā sukūñ hai yuuñ hai

sajī huī hai sitāroñ kī anjuman ai dil
ki paara paara falak par bikhar gayā sūraj

na dil dimāġh kā is meñ qusūr hotā hai
kisī se ek nazar kā fitūr hotā hai

rivāyateñ bhī ajab haiñ baḌī mohabbat kī
jo dil ke paas ho āñkhoñ se duur hotā hai

hotā hai 'shu.ūr' dard dil meñ
phoḌā ye dikhā.iye kisī ko

maiñ us ko nafratoñ ke sivā kuchh na de sakā
vo chāhatoñ kā biij mire dil meñ bo gayā

haiñ ishq kī rāheñ pechīda manzil pe pahuñchnā sahl nahīñ
raste meñ agar dil baiTh gayā phir us kā sambhalnā mushkil hai

dekh ke mujh ko ġhaur se phir vo chup se ho ga.e
dil meñ ḳhalish hai aaj tak is an-kahe savāl kī

nazar manzar meñ jis ko DhūñDhtī thī
vo dil kī anjuman meñ aa rahā hai

dil sā khilaunā haath aayā hai
khelo toḌo jī bahlāo

kaun hai ham sā chāhne vaalā
itnā bhī ab dil na dukhāo

husn thā jab mastūr hayā meñ
ishq thā ḳhūn-e-dil kā rachāo