Tags-Dil

ka.aba ho kalīsā ho dil ho ki sanam-ḳhāna
jalva ho jahāñ terā ābād vo kāshāna

chhoTā sā mirā dil hai TuuTā sā mirā dil hai
sūrat meñ to paimāna vus.at meñ hai mai-ḳhāna

dil se hai lagī ye lo ik zarra barābar zau
paḌ jaa.e tirā partav ai jalva-e-jānāna

begāna yagāna hai dil ā.ina-ḳhāna hai
ka.abe kā ye ka.aba hai but-ḳhāne kā but-ḳhāna

na to yaad huuñ koī pur-kashish na hī ḳhvāb huuñ koī ḳhushnumā
dil-e-shād ko jo kare dukhī vo ḳhayāl huuñ maiñ dimāġh kā

dil ne kis manzil-e-be-nām meñ chhoḌā thā mujhe
raat bhar ḳhud mire saa.e ne bhī DhūñDā thā mujhe

ye soch kar kabhī aks us kiran kā utrā thā
is ā.īna meñ sadā dil khilā rahegā mirā

na kyuuñ ho da.avā barābarī kā vahāñ milā til yahāñ suvaidā
ye nuqta-e-intiḳhāb-e-āriz hai vo nuqta-e-intiḳhāb-e-āriz

janāb-e-'mā.il' ye kūdak-e-dil butoñ kī ulfat meñ hogā kāmil
paḌhāo qur.āñ ke badle is ko bayāz-e-gardan kitāb-e-āriz

hazār chāhā lagā.eñ kisī se dil lekin
bichhaḌ ke tujh se tire shahr meñ rahā na gayā

sunāyā karte the dil ko hikāyat-e-daurāñ
magar jo dil ne kahā ham se vo sunā na gayā

samajh meñ aane lagā jab fasāna-e-hastī
kisī se hāl-e-dil-e-zār phir kahā na gayā

koī nām-o-nishāñ pūchhe to ai qāsid batā denā
taḳhallus 'dāġh' hai vo āshiqoñ ke dil meñ rahte haiñ

kam nahīñ ai dil-e-betāb matā-e-ummīd
dast-e-mai-ḳhvār meñ ḳhālī hī sahī jaam to hai

arsa-e-hijr se phir vasl kī sarshārī tak
hausla dil ko bahut chāhiye paspā.ī kā

hai kabhū dil meñ kabhū jī meñ kabhū āñkhoñ ke biich
kaun kahtā hai use yaaro ki harjā.ī nahīñ

aaj apne dil se phir uljhā huuñ maiñ
mudda.ā ye hai ki dekhūñ kyā huuñ maiñ

letā huuñ maktab-e-ġham-e-dil meñ sabaq hanūz
lekin yahī ki raft gayā aur buud thā

ai dil vo āshiqī ke fasāne kidhar ga.e
vo umr kyā huī vo zamāne kidhar ga.e

aa.iye mere dil meñ bhī vaqt-e-ġhazal
ek dariyā-e-ātish ravāñ dekhiye