Tags-Dil

apnī lahroñ se zarā kah de ki hushiyār raheñ
dil meñ tūfān chhupāyā hai samundar maiñ ne

tujh ko parvāh nahīñ va.ade kī to apne na sahī
pyaar kā dil meñ chhupāyā hai samundar maiñ ne

terī duniyā ko ujāloñ se sajāne ke liye
dil charāġhoñ sā jalāyā hai samundar maiñ ne

na mil sakā jise īñdhan jalegī aag vo kyā
dil-e-'jamīl' ko nāhaq kuredte ho tum

rūdād-e-mohabbat sun sun kar ḳhud husn ko bhī niiñd aane lagī
ab aur kahāñ se laa.eñ dil ab aur kahānī kyā kahiye

'farhat' kā patā pūchhe jo koī kaafī hai faqat ye kaafī hai
phūTī huī qismat TuuTā dil ab aur nishānī kyā kahiye

dil meñ hamāre dard zamāne kā hai nihāñ
paivast dil meñ saikḌoñ paikāñ jafā ke dekh

ban jā.egā kabhī na kabhī dard hī davā
'as.ad' ke dil meñ dard kī shiddat baḌhā ke dekh

umiid rañj alam zabt dard sabr qalaq
ye sab hamāre dil-e-nā-tavāñ meñ rahte haiñ

agar samajh hai to dil de ke lutf-e-zīst uThā
hazār fā.ede us ik ziyāñ meñ rahte haiñ

nikal gayā mirī āñkhoñ se misl-e-ḳhvā-o-ḳhayāl
guzar gayā dil-e-raushan se vo nazar ban kar

ḳhushā ai dil mudāvā un ke zaḳhmoñ kā nahīñ varna
kahāñ har zaḳhm kī qismat meñ hai nāsūr ho jaanā

baḌhānā is tarah se be-qarārī aur bhī dil kī
jhalak ushshāq ko dikhlā ke phir mastūr ho jaanā

nazar chhalke na chhalke munhasir hai zarf par lekin
hai pahlī shart dil kā dard se māmūr ho jaanā

dil ke sahrā meñ baḌe zor kā bādal barsā
itnī shiddat se koī raat mujhe yaad aayā

dil se aatī hai baat lab pe 'hafīz'
baat dil meñ kahāñ se aatī hai

dil meñ zauq-e-vasl o yād-e-yār tak baaqī nahīñ
aag is ghar meñ lagī aisī ki jo thā jal gayā

koī nahīñ kartā jo kiyā tū ne 'nazīr' aah
dil us ko diyā jis ke nahīñ naam se vāqif

yuuñ tasallī ko to ik yaad bhī kaafī thī magar
dil ko taskīn tire lauT ke aane se milī

sabhī ke dil meñ 'diyā' pyaar kā jalātī huuñ
varaq varaq pe ujālā likhī ga.ī huuñ maiñ