Tags-Dil

na ye ġham nayā na sitam nayā ki tirī jafā kā gilā kareñ
ye nazar thī pahle bhī muztarib ye kasak to dil meñ kabhū kī hai

dil khol ke jī chāhtā hai ḳhaak uḌā.ūñ
phirne ko milā hai mujhe maidān-e-bayābāñ

sheroñ ke hilā Daale haiñ dil us ke junūñ ne
majnūñ hai ki hai rustam-e-dastān-e-bayābāñ

phir aaj ahl-e-jaur ko shikast-e-fāsh ho ga.ī
phir aaj ahl-e-dil ne parcham-e-'vafā' uThā liyā

jhaTakiye to zarā zulfeñ ye bhīgī
ye dil pūchhe hai ki barsāt kyā hai

hai jiitā dil ko baazī haar kar bhī
mohabbat hai to shah aur maat kyā hai

us ke hote hue bhī is dil meñ
ye na ho aur koī aa jaa.e

tum tak na pahuñch jaa.e lau sham-e-mohabbat kī
jab tuur ko phūñkā thā ab dil ko jalānā hai

mahdūd-e-zabāñ kab tak afsāna mohabbat kā
āñkhoñ se bhī kahnā hai dil se bhī sunānā hai

kis nazar se aap ne dekhā dil-e-majrūh ko
zaḳhm jo kuchh bhar chale the phir havā dene lage

kaisī kaisī raah meñ dīvāreñ karte haiñ haa.il log
phir bhī manzil pā lete haiñ ham jaise zinda dil log

barf ke ā.īna-ḳhānoñ meñ sho.aloñ kā siñgār kareñge
aivānoñ meñ aish manā kar taḌpeñge patthar dil log

kuchh ajab hālat hai ai dil kuchh samajh aatā nahīñ
so raheñ ghar jā ke yā galiyoñ meñ ghūmeñ kyā kareñ

ai dil tirī barbādī ke āsār bahut haiñ
shahkār ke bahrūp meñ fankār bahut haiñ

yādoñ kī bahāreñ bhī haiñ vīrāna-e-dil meñ
is dasht-e-bayābāñ meñ ye gulzār bahut haiñ

dil ḳhud jo nahīñ rakhte haiñ vo lete bhī nahīñ dil
ḳhuddār ziyāda haiñ jo nādār bahut haiñ

jiine ke liye dil meñ jagah chāhiye varna
marnā hai to phir bas dar-o-dīvār bahut haiñ

dīvān pe dīvān bhī kam hote haiñ 'pinhāñ'
ash.ār jo dil chhū leñ vo do chaar bahut haiñ

siine se lipTo yā galā kaaTo
ham tumhāre haiñ dil tumhārā hai

kitnī aaseñ TuuT ga.iiñ
kitnā dil ranjūr huā