Tags-Dil

laraztā hai mirā dil zahmat-e-mehr-e-daraḳhshāñ par
maiñ huuñ vo qatra-e-shabnam ki ho ḳhār-e-bayābāñ par

kyā hai is dil kā haal mat pūchho
ham se nāzuk savāl mat pūchho

kartā hai koī aur bhī girya mire dil meñ
rahtā hai koī aur bhī mujh sā mire dil meñ

vo mil gayā phir bhī ye lagātār udāsī
shāyad hai koī aur bhī dhaḌkā mire dil meñ

ik rañj meñ Duubā huā be-nām musāfir
aayā thā baḌī duur se Thahrā mire dil meñ

jis shaam ko bhūle hue ik umr huī thī
chamkā hai usī shaam kā taarā mire dil meñ

ik huuk sī uThtī hai sar-e-bām-e-tamannā
vo merī ḳhushī se kabhī rahtā mire dil meñ

aa.e haiñ yahāñ tak to chalo us se bhī mil leñ
ye dhyān bhī ik baar to aayā mire dil meñ

jis aag ko kahte haiñ qayāmat se nahīñ kam
bahtā hai usī aag kā dariyā mire dil meñ

dil ajab shahr ki jis par bhī khulā dar is kā
vo musāfir ise har samt se barbād kare

'ishq' apnī fanā kā ḳhauf sarkash ke nahīñ dil meñ
kab sham.a ye hai raushan jo sub.h bhī hotī hai

maiñ dil ko us kī taġhāful-sarā se le aayā
aur apne ḳhāna-e-vahshat meñ zer-e-dām rakhā

julūs-e-shola-ruḳhāñ kis taraf ko guzregā
koī batā.e kahāñ ahl-e-dil qayām kareñ

hamāre jaam meñ mai bhī hai ḳhūn-e-dil bhī hai
ye dekhnā hai ḳhudā vaale kyā harām kareñ

sarzamīñ zulf kī jāgīr meñ thī is dil kī
varna ik daam kā phir us meñ Thikānā kyā thā

dil na sah paayā kisī aur se qurbat us kī
mujh ko dīvār se tasvīr haTānī paḌī thī

dhaḌkaneñ muñh ko aa rahī haiñ 'hasan'
dil nahīñ e'tidāl par filhāl

gayā sab andoh apne dil kā thame ab aañsū qarār aayā
nasīb jaage sitāra chamkā phire din apne vo yaar aayā

uThā.ī kyā kyā na maiñ ne zahmat magar na kī tark us kī ulfat
rahā hamesha maiñ saaf tīnat kabhī na dil par ġhubār aayā