Tags-Dil

muddatoñ se yahī aalam na tavaqqo na umiid
dil pukāre hī chalā jaatā hai jānāñ jānāñ

nigāhoñ meñ nigah Daale nashe meñ chuur matvāle
paḌheñge dil ke afsāne sitāro tum to so jaao

hue haiñ TukḌe TukḌe ab dil-e-bismil ke ai 'kaifī'
ki hogā kyā ḳhudā jaane sitāro tum to so jaao

jin kī yādoñ se raushan haiñ merī āñkheñ
dil kahtā hai un ko bhī maiñ yaad aatā huuñ

din kaTtā hai sūraj kī hamrāhī meñ
shab ko dil ke daaġh bhī jalne lagte haiñ

ḳhvāb umreñ galī rāste
zindagī se haiñ dil tañg sab

jo TūTnā thā faqat dard hī kā rishta thā
to dil ne kyuuñ bhalā is baat par malāl kiyā

dil-lagī meñ hasrat-e-dil kuchh nikal jaatī to hai
bose le lete haiñ ham do-chār hañste bolte

din meñ is tarah mire dil meñ samāyā sūraj
raat āñkhoñ ke ufuq par ubhar aayā sūraj

aane vaalī hai kyā balā sar par
aaj phir dil meñ dard hai kam kam

zarā andāz to dekhe koī in dil-figāroñ kā
palaTte haiñ varaq maazī kā mustaqbil ko rote haiñ

guzartī hai isī aalam meñ 'rahbar' zindagī apnī
kabhī dil ham ko rotā hai kabhī ham dil ko rote haiñ

dil ko jalā.e rakkhā hai ham ne charāġh sā
is ghar meñ ham haiñ aur tirā intizār hai

har lahza dhaḌaktā hai dil-e-ḳhāna-ḳharāb
har lamha bajātā hai baġhāvat kā raubāb

vo jo dāġh-e-ishq thā ḳhush-numā jo amānat-e-dil-e-zār thā
sar-e-bazm thā to charāġh thā sar-e-rāh thā to ġhubār thā

tire dil se merā ḳhulūs-e-dil na jhalak sakā to maiñ kyā karūñ
mire aks kī to ḳhatā na thī tire ā.īne pe ġhubār thā

iztirāb-e-ārzū kā saath deñ to kis tarah
dil purānā ho chukā hai aur nayā miltā nahīñ

buland-o-past haqīqat se āshnā na huā
vo dil ki jis meñ koī harf-e-mudda.ā na huā

vo zinda dil thā maiñ sahtā rahā ġham-e-duniyā
usī meñ jaan dī lekin gurez-pā na huā

tumhīñ batāo ki is dil kā kyā kiyā jaa.e
jo choT khā ke bhī choToñ se āshnā na huā