Tags-Dil

munsifī chūmtī rahtī hai dar-e-ahl-e-dil
ai adālat tire kirdār se vāqif maiñ huuñ

dil kī bastī ajiib bastī hai
ye ujaḌne ke ba.ad bastī hai

kis ke savāl par ye dil rotā hai saarī saarī raat
kaun habīb hai mirā tere ḳhayāl ke sivā

lutf-e-āġhāz milā lazzat-e-anjām ke ba.ad
hausla dil kā baḌhā koshish-e-nākām ke ba.ad

tā hadd-e-taḳhayyul faqat ik jalva hai yā dil
duniyā meñ hamārī na falak hai na zamīñ hai

aa jaa.e na dil aap kā bhī aur kisī par
dekho mirī jaañ aañkh laḌānā nahīñ achchhā

shor hamesha rahtā hai is kūche meñ
dil hai yā siine meñ ik zindānī hai

hūr-o-parī pe kyā hai hamārā sivā.e yaar
dil aur kī taraf hai na jaañ aur kī taraf

ghar dil meñ tū hamāre ḳhudā ke liye na le
ai ḳhānumāñ-ḳharāb makāñ aur kī taraf

bardāsht kī hadoñ se mirā dil guzar gayā
āñdhī uThī to ret kā Tiila bikhar gayā

rāhat maiñ dil ke hāthoñ na pā.ūñgā ek-dam
jab tak ki mere saath ye ḳhāna-ḳharāb hai

ashk ko aañkh kī dahlīz pe laayā na karo
dil ke hālāt zamāne ko batāyā na karo

apnī āñkhoñ meñ hasīñ ḳhvāb sajāyā na karo
pyaar kā tāj-mahal dil ko banāyā na karo

sañg-dil jo bhī haiñ un ko na basāo dil meñ
shīsh-mahloñ meñ kabhī sañg lagāyā na karo

mire dil ke ḳhuun kī misl thā tujhe yaad hai mire dilrubā
koī rañg rañg-e-hinā bhī thā tire naqsh-hā-e-jamāl meñ

koī ik chamak mire dil ko de ki safar hudūd-e-zamāñ kā hai
koī ek sā.at-e-raushnī mirī gardish-e-mah-o-sāl meñ

mujhe sharq-o-ġharb se kaam kyā ki maqām-e-shauq guzar gayā
ye khilā.e dil ke haiñ dā.ere ye safar hai ab mirā haal meñ

jaise ġhunche khil uThte haiñ tar ho kar ashk-e-shabnam se
dil shab-bhar hijr meñ ro ro kar har sub.h yūñhī masrūr bhī hai

kabhī to dosto apne vatan kī baat kareñ
kabhī to chāk-e-dil-o-pairahan kī baat kareñ

haqīqat sāmne thī aur haqīqat se maiñ ġhāfil thā
mirā dil terā jalva thā tirā jalva mirā dil thā