Tags-Dil

ban baiThtā hai muft mire jī kā mudda.ī
iz.hār us se dil kā maiñ jab mudda.ā kiyā

be-mehrī terī kyā kahūñ ai sañg-dil ki chuur
mujh dil kā shīsha tū ne ba-sañg-e-jafā kiyā

us bin na qibla samjhūñ na qibla-numā ko maiñ
qibla use dil apne ko qibla-numā kiyā

kyā kaheñ lafz-e-mohabbat hai garāñ
dil ke aurāq uThā kar dekho

dil kī jannat ko sukūñ kuchh to mile
dasht-o-sahrā hī basā kar dekho

halchal jo dil meñ thī vo na lafzoñ meñ Dhal sakī
rishte zabān o dil ke bahut joḌte rahe

ubhrā kiye shokūk na.e dil meñ har ghaḌī
har dam nayā shagūfa koī chhoḌte rahe

jo reza reza nahīñ dil use nahīñ kahte
kaheñ na ā.īna us ko jo pāra-pāra nahīñ

jhapak jo mukhḌe kī dekhī us ke to ham ne apne ye dil meñ jaanā
unhī ke partav se mah hai raushan usī kā nuur āftāb meñ hai

rahegā mahbūb jis makāñ meñ to vaañ hī dekheñge us ko jā kar
ġharaz vo jis kā ki naam dil hai ye dhun us ālī-janāb meñ hai

bañdhā hai jab se ḳhayāl us kā ajab tarah kī lagan lagī hai
kabhī vo dil meñ kabhī vo jī meñ kabhī vo chashm-e-pur-āb meñ hai

'nazīr' sīkhe se ilm rasmī bashar kī hotī haiñ chaar āñkheñ
paḌhe se jis ke hoñ laakh āñkheñ vo ilm dil kī kitāb meñ hai

qarīb-e-dīda-o-dil is qadar jo tū ho jaa.e
to kyā ajab tirī tārīf meñ ġhulū ho jaa.e

tumhārī chashm-e-karam hī se hai bharam dil kā
vo din na aa.e ki ye jaam be-subū ho jaa.e

ek bose se murād-e-dil-e-nāshād to do
kuchh na do haath se par muñh se mirī daad to do

dimāġh ahl-e-mohabbat kā saath detā nahīñ
use kaho ki vo dil ke kahe meñ aa jaa.e

fasurda-dil kabhī ḳhalvat na anjuman meñ rahe
bahār ho ke rahe ham to jis chaman meñ rahe

ik sadma dard-e-dil se mirī jaan par to hai
lekin balā se yaar ke zaanū pe sar to hai

hai dard dil meñ gar nahīñ hamdard mere paas
dil-soz koī gar nahīñ soz-e-jigar to hai

ai dil hujūm-e-dard-o-alam se na tañg ho
ḳhāna-ḳharāb ḳhush ho ki ābād ghar to hai