Tags-Dil

dil meñ ruktī nahīñ tirī yādeñ
nok-e-mizhgāñ se aa Tapaktī haiñ

tum chaman-zād ho fitrat ke qarīñ rahte ho
dil ye kahtā hai ki tum mahram-e-asrār bhī ho

auroñ se to girānī yak-laḳht uTh ga.ī hai
ai 'dard' apne dil ke gar baar haiñ to ham haiñ

jiite agar na ham to kyuuñ zillateñ uThāte
khaa.ī hai dil pe ham ne talvār zindagī se

mujhe mayassar haiñ saare rishte vahī nahīñ hai
bhalā maiñ kis dil se shauq kī rā.egānī likkhūñ

kabhī jo dariyā chaḌhā thā dil kā utar chukā hai
to kyā maiñ jazbāt ke talātum ko faanī likkhūñ

ab dard-e-mohabbat ko ai dil minnat-kash-e-darmāñ kaun kare
ḳhud apne hī hāthoñ ulfat kā barbād gulistāñ kaun kare

is shān-e-taġhāful par āḳhir jī chhūT gayā dil TuuT gayā
jab dil hī hamārā TuuT chukā phir aap ko mehmāñ kaun kare

ab tark-e-sitam ke kyā ma.anī har roz nayā gul khilne do
do-chār daraḳhshāñ dāġhoñ se dil rashk-e-gulistāñ kaun kare

terī yaad kā har manzar pas-manzar likhtā rahtā huuñ
dil ko varaq banātā huuñ aur shab bhar likhtā rahtā huuñ

ġham aur ḳhushī meñ farq na mahsūs ho jahāñ
maiñ dil ko us maqām pe laatā chalā gayā

terī yādoñ se gurezāñ honā
ab ġham-e-dil kī davā ho jaise

ik ajab dhaḌkā dil-o-jāñ ko lagā rahtā hai
jab bhī pardes se ham lauT ke ghar aa.e haiñ

mohabbat kī duniyā meñ mash.hūr kar duuñ
mirī sāda-dil tujh ko maġhrūr kar duuñ

tire dil ko milne kī ḳhud aarzū ho
tujhe is qadar ġham se ranjūr kar duuñ

mire dil meñ hai shola-e-husn raqsāñ
maiñ chāhūñ to har zarre ko tuur kar duuñ

phir jins-e-dil na apnī kisī ne ḳharīd kī
sach hai ki qadr kuchh nahīñ māl-e-mazīd kī

be-shubah ai 'qalaq' sag-e-duniyā hai vo bashar
jis ne ba-dil itā.at-e-nafs-e-palīd kī

vo din ga.e ki uThāte the yaar nik.hat-e-gul
hai be-dimāġhī-e-dil in diloñ girāñ mujh ko

tū apne dil hī dil meñ bas mujhe āvāz detā rah
samā.at ko mirī varna ye sannāTā pakaḌ legā