Tags-Dil

sau tarah ke ārām mayassar sahī lekin
dil jiine se bezār hai ma.alūm nahīñ kyuuñ

jo lazzatī-e-jaur-o-jafā thā usī dil par
ik shoḳh-nazar baar hai ma.alūm nahīñ kyuuñ

huuñ maiñ bhī vahī merā muqābil bhī vahī hai
patthar bhī vahī ā.īna-e-dil bhī vahī hai

pahle to ik junūn sā arz-e-talab kā thā
jab vo milā to dal ne taqāzā nahīñ kiyā

na mere dil na jigar par na dīda-e-tar par
karam kare vo nishān-e-qadam to patthar par

salāhiyat bhī to paidā kar ai dil-e-muztar
paḌā hai naqsh-e-kaf-e-pā-e-yār patthar par

dil kī tarah hī ab mirī duniyā ḳharāb hai
so apnā haal in dinoñ achchhā ḳharāb hai

makān-e-dil se jo uThtā thā vo dhuāñ bhī gayā
bujhī jo ātish-e-jāñ ziist kā nishāñ bhī gayā

muzhda ai ganj-e-shahīdāñ tere bhī din phir ga.e
aaj dil-bardashta duniyā se 'jauhar' ho gayā

na bhūlnā ki 'umar' haiñ ye dostoñ ke hisāb
kabhī na paḌhnā jo dil kī kitāb meñ likhnā

sīna-kobī-e-sañg se dil-e-ḳhūn hone meñ rahī
haq-ba-jānib thā hamāre saḳht mātam ho gayā

ishq un shahrī ġhazāloñ kā junūñ ko ab khiñchā
vahshat-e-dil baḌh ga.ī ārām-e-jāñ ram ho gayā

dil hai na nishān be-dilī kā
kyā vaqt paḌā hai be-kasī kā

aañsū bhar aa.e dil bhar aayā
gar naam bhī sun liyā ḳhushī kā

le kahīñ duur chal ai ġham-e-dil mujhe
raas aa.ī nahīñ terī mahfil mujhe

dil kī duniyā kā aalam batā duuñ bhalā
paas kuchh bhī nahīñ sab hai hāsil mujhe

ab jo hone ke qisse sabhī ho chuke tum hameñ kho chuke ham tumheñ kho chuke
aage dil kī na bātoñ meñ aanā sajan ki ye dil hai sadā kā divānā sajan

shahr ke log achchhe haiñ hamdard haiñ par hamārī suno ham jahāñ-gard haiñ
dāġh-e-dil mat kisī ko dikhānā sajan ye zamāna nahīñ vo zamāna sajan

dil abhī tak javān hai pyāre
kis musībat meñ jaan hai pyāre

jab phail ke vīrānoñ se vīrāne mileñge
dil khol ke dīvānoñ se dīvāne mileñge