dil kī tarah hī ab mirī duniyā ḳharāb hai
so apnā haal in dinoñ achchhā ḳharāb hai
aañsū bahe to yuuñ huā bīnā.ī baḌh ga.ī
phir saaf saaf dikh gayā kyā kyā ḳharāb hai
pahle-pahal to maiñ tirā yak-tarfa ishq thā
ab merā haal tujh se ziyāda ḳharāb hai
duniyā se tañg shaḳhs ko achchhī hai ḳhud-kushī
ġharqāb hote shaḳhs ko tinkā ḳharāb hai
to ishq se miTā.eñge duniyā kī nafrateñ
'mishrā' jī aap Thiik haiñ māthā ḳharāb hai