Tags-Dil

ik taraf shor ḳhāna-e-dil meñ
aql rahtī hai be-zabān alag

dil ho ḳharāb diin pe jo kuchh asar paḌe
ab kār-e-āshiqī to bahar-kaif kar paḌe

daanā vahī hai dil jo kare aap kā ḳhayāl
biinā vahī nazar hai ki jo aap par paḌe

rakhtā huuñ yaad is liye har fasl-e-gul 'shahāb'
din hoñ bure hazār magar dil burā na ho

halqa-e-dil se na niklo ki sar-e-khūcha-e-ḳhāk
aish jitne haiñ isī kunj-e-kam-āsār meñ haiñ

bichhaḌne vāloñ meñ ham jis se āshnā kam the
na jaane dil ne use yaad kyuuñ ziyāda kiyā

ye kahūñgā ye kahūñgā ye abhī kahte ho
sāmne un ke bhī jab hazrat-e-dil yaad rahe

ḳhushī kī rut ho ki ġham kā mausam nazar use DhūñDtī hai har dam
vo bū-e-gul thā ki naġhma-e-jāñ mire to dil meñ utar gayā vo

na ab vo yādoñ kā chaḌhtā dariyā na fursatoñ kī udaas barkhā
yūñhī zarā sī kasak hai dil meñ jo zaḳhm gahrā thā bhar gayā vo

bas ek manzil hai bul-havas kī hazār raste haiñ ahl-e-dil ke
yahī to hai farq mujh meñ us meñ guzar gayā maiñ Thahar gayā vo

mirā tū ḳhuuñ ho gayā hai paanī sitamgaroñ kī palak na bhīgī
jo naala uTThā thā raat dil se na jaane kyuuñ be-asar gayā vo

mausīqī-e-husn kī maujeñ thī kuchh āñkhoñ meñ kuchh pyāloñ meñ
jo sāhil-e-dil tak ho aa.eñ yādoñ ke ek safīne meñ

palkoñ meñ sulagte tāroñ se maiñ raat kī afshāñ chun na sakā
sho.aloñ ko chhupā.e phirtā huuñ maiñ dil ke ek nagīne meñ

naḳhīl-e-zīst kī chhāñv meñ nai-ba-lab tirī yaad
fasīl-e-dil kī kalas par sitāra-jū tirā ġham

nigah uThī to zamāne ke sāmne tirā ruup
palak jhukī to mire dil ke rū-ba-rū tirā ġham

maiñ bāz-gasht-e-dil huuñ paiham shikast-e-dil huuñ
vo aazmā rahā huuñ jo aazmā chukā huuñ

zindagī kyā hue vo apne zamāne vaale
yaad aate haiñ bahut dil ko dukhāne vaale

nīndeñ to ye kahtī haiñ chalo chain se so.eñ
dil siine meñ kahtā hai abhī jāgte rahnā

dil ke vo daaġh jo siine meñ chhupā rakkhe haiñ
ai masīhā vo kabhī tū ne bhī dekhe hote

ham jalā lete agar terī mohabbat ke charāġh
in añdheroñ kī jagah dil meñ ujāle hote