Tags-Dil

uf re ye begānagī hamdard ho to kaun ho
ek dil thā vo bhī sarf-e-kasrat-e-ālām hai

bazm ho yā tanhā.ī ho
har jā dil ko raas hai tū

ābād usī ne dil kī vaadī kī hai
tārīḳh ne aksar ye munādī kī hai

baaqī na rahe saakh 'adā' dasht-e-junūñ kī
dil meñ agar andesha-e-anjām hī aa.e

ho gayā band dar-e-mai-kadā kyā qahr huā
shauq-e-pā-bos-e-hasīnāñ jo tujhe thā ai dil

ibādat ke liye tat.hīr-e-dil kī bhī zarūrat hai
vazū ke baad phir ashk-e-nadāmat se vazū karnā

taġhāful par taġhāful ho rahe haiñ
kisī kī dil-lagī hai aur maiñ huuñ

vo ā.eñge nahīñ-nahīñ nahīñ-nahīñ vo ā.eñge
ye raaz raaz hī rahe dil-e-hazīñ ye raaz hai

ab vo merī aañkh pe īmāñ laayā hai
dasht hī thā ye dil bhī jal-thal hone tak

dhuup chhāñv sā vo ik shaḳhs mire shahr meñ thā
dil meñ haañ aur vo hoñToñ pe nahīñ rakhtā thā

aap apne meñ ba-zāhir to bahut ḳhush thā 'safī'
dil meñ dukhtī sī ḳharāsheñ bhī kahīñ rakhtā thā

dil ke tāroñ se dard uThtā hai
soz hotā nahīñ rubāboñ meñ

lagī thī us kī buniyādoñ meñ dīmak
so ab dil kī imārat Dhah rahī hai

kahīñ ye ḳhushk ho jaa.e na sāthī
mire dil meñ jo nadiyā bah rahī hai

mire dil ke akele ghar meñ 'rāhat'
udāsī jaane kab se rah rahī hai

dil bhī un ke haiñ siyah ḳhūrāk-e-zindāñ kī tarah
un se apnā ġham bayāñ ab ham ko karnā hī nahīñ

kisī tarah nahīñ jaatī fasurdagī dil kī
to zard rañg kā ik āsmāñ banāte haiñ

dil-e-sitam-zada kyā hai lahū kī buuñd to hai
is ek buuñd ko ham be-karāñ banāte haiñ

dil-e-kam-alam pe vo kaifiyat ki Thahar sake na guzar sake
na hazar hī rāhat-e-rūh thā na safar meñ rāmish raah thī

vo jo raat mujh ko baḌe adab se salām kar ke chalā gayā
use kyā ḳhabar mire dil meñ bhī kabhī ārzū-e-gunāh thī