ye kahnā thā jo duniyā kah rahī hai
ye gañgā kab se ulTī bah rahī hai
ḳhabar hai ḳhvāb TūTegā yaqīnan
magar ik fāḳhta dukh sah rahī hai
lagī thī us kī buniyādoñ meñ dīmak
so ab dil kī imārat Dhah rahī hai
kahīñ ye ḳhushk ho jaa.e na sāthī
mire dil meñ jo nadiyā bah rahī hai
sitāra band muTThī meñ milegā
mirī taqdīr mujh se kah rahī hai
mire dil ke akele ghar meñ 'rāhat'
udāsī jaane kab se rah rahī hai