Tags-Dil

dil chaḌhā mushkil se tāq-e-abru-e-ḳhamdār par
sau jagah raste meñ jab zulf-e-rasā pakḌī ga.ī

mushkileñ dil meñ na.ī sham.eñ jalā detī haiñ
ġham se bujh jaanā to durveshoñ kā dastūr nahīñ

tirī intizārī se uktā gayā dil
tirī raah muddat se ham dekhte haiñ

raushan vo dil pe mere dil-āzār se huā
ik ma.arka jo hairat o zañgār se huā

zulf se jakḌā pahle to dil phir us kā tamāsha dekhne ko
nazroñ kā us par sehr kiyā aur kar ke divānā chhoḌ diyā

zindagī mahbūb hai phir bhī duā.eñ maut kī
māñgtā hai dil mirā din raat kyuuñ

qasr-o-mahl dil-pazīr zīnat-o-zeb ai 'nazīr'
koī ise kuchh kaho ham to samajhte haiñ ḳhvāb

bhūlā-bisrā afsāna haiñ aaj us ke nazdīk
kal tak the jis dil kī dhaḌkan chāñd havā aur maiñ

na tirā visāl visāl thā na tirī judā.ī judā.ī hai
vahī hālat-e-dil-e-bad-gumāñ tire saath bhī tire ba.ad bhī

ik shakl hameñ phir bhaa.ī hai ik sūrat dil meñ samā.ī hai
ham aaj bahut sarshār sahī par aglā moḌ judā.ī hai

gulshan meñ le ke chal kisī sahrā meñ le ke chal
ai dil magar sukūn kī duniyā meñ le ke chal

koī to hogā jis ko mirā intizār hai
kahtā hai dil ke shahr-e-tamannā meñ le ke chal

har chand ghaTā.eñ chhaT ga.ī haiñ
par dil pe ġhubār sā hai ab tak

ishq meñ kyā nuqsān naf.a hai ham ko kyā samjhāte ho
ham ne saarī umr hī yaaro dil kā kārobār kiyā

kisī tarah kī ibādat ravā nahīñ rakhūñgā
sanam rakhūñgā maiñ dil meñ ḳhudā nahīñ rakhūñgā

kuchh dil hī na maa.il huā is raah pe varna
sāmān to jannat kī kamā.ī ke bahut the

āzār kī ḳhaslat bhī thī logoñ meñ numāyāñ
kuchh shauq bhī is dil ko bhalā.ī ke bahut the

yahī charāġh hai sab kuchh ki dil kaheñ jis ko
agar ye bujh gayā to aadmī bhī parchhā.īñ

yādash-ba-ḳhair dil kā ḳhayāl aa ke rah gayā
is be-dilī meñ jiite haiñ kis be-hisī se ham

jo dil meñ thā vo miltā hai saath apne ḳhaak meñ
tum duur aur kah na sake kuchh kisī se ham