Tags-Dil

ye sach nahīñ ki tamāzat se Dar ga.ī hai nadī
sukūn-e-dil ke liye apne ghar ga.ī hai nadī

hai 'amjad' aaj tak vo shaḳhs dil meñ
ki jo us vaqt bhī merā nahīñ thā

ye zaḳhm-e-dil nahīñ ehsān kī nishānī hai
ham us nigāh kā ehsān le ke aa.e haiñ

apnī kahānī dil meñ chhupā kar rakhte haiñ
duniyā vāloñ ko hairān nahīñ karte

zaḳhm-e-talāsh meñ hai nihāñ marham-e-dalīl
tū apnā dil na haar mohabbat bahāl rakh

dil huā kasmakash-e-chāra-e-zehmat meñ tamām
miT gayā ghisne meñ is uqde kā vā ho jaanā

dil se miTnā tirī añgusht-e-hinā.ī kā ḳhayāl
ho gayā gosht se nāḳhun kā judā ho jaanā

dil-e-tabāh jo honā thā vo to ho hī gayā
zamāna kuchh bhī kahe tū to un kā naam na le

badan kī aag ko kahte haiñ log jhūTī aag
magar us aag ne dil ko mire gudāz kiyā

kis kā chamaktā chehrā laa.eñ kis sūraj se māñgeñ dhuup
ghuur añdherā chhā jaatā hai ḳhalvat-e-dil meñ shaam hue

bār-hā dil ne tirā qurb bhī chāhā thā magar
aaj kī tarah tamannā.ī nahīñ thā itnā

ek ḳhilqat hī nahīñ hai bad-gumānī kā shikār
us kī jānib se mire bhī dil meñ shak aane ko hai

ab rahā dil tā-qayāmat abrū-e-ḳham-dār par
kyā haTegā vo jo gardan rakh chukā talvār par

nazar sū-e-kāba hai dil but-kade meñ
ham andāz-e-ahl-e-haram dekhte haiñ

'mushīr' ahl-e-bīnash mirī har ġhazal meñ
dimāġh aur dil ko baham dekhte haiñ

dard auroñ kā dil meñ gar rakhiye
be-ġharaz ho ke umr-bhar rakhiye

aap kī sāda-dilī se tañg aa jaatā huuñ maiñ
mere dil meñ rah chuke haiñ is qadar hushyār log

kuchh na pūchho himmatoñ se kaam kyā lete haiñ ham
ġham ko baada dil ko paimāna banā lete haiñ ham

kyuuñ mizāj-e-husn meñ paidā kareñ ik barhamī
apne dil ko apnā afsāna sunā lete haiñ ham

dil kī chorī meñ jo chashm-e-surma-sā pakḌī ga.ī
vo thā chīn-e-zulf meñ ye be-ḳhatā pakḌī ga.ī