Tags-Dil

jo komal sundar laḌkī ho
to dil apnā sauġhāt karo

dil kī girah na vā huī dard-e-shab-e-visāl
guzrī tamām bast-o-kushād-e-naqāb meñ

kyuuñ zaḳhm dikhā.eñ ham 'shamsī' ab kaun lagā.egā marham
sab log to dil meñ hans hans kar ḳhanjar hī utārā karte haiñ

qadr tāzīm kashish shauq mohabbat iz.hār
rokiye dil ko na jaane ye kahāñ tak pahuñche

dil ye har-gām pe kahtā hai Thahar ghar hai yahī
farq se tā-ba-qadam aañkh jahāñ tak pahuñche

jaan lenā ye usī lamha ki dil TuuT gayā
baat jab zabt se baḌh jaa.e fuġhāñ tak pahuñche

muḌ ke dekhā bhī nahīñ dil ke lahū kī jānib
sher kī daad ye dī husn-e-bayāñ tak pahuñche

afsāna-e-ġham yuuñ bhī dil-e-zār kahā hai
ik baar jo pūchhā hai to sau baar kahā hai

mumkin hai usī raah se manzil pe pahuñch jaa.eñ
dil vāloñ ne jis raah ko dushvār kahā hai

gila ai dil abhī se kartā hai
ishq kā dam usī pe bhartā hai

ai dil tū unheñ dekh ke kuchh aise taḌapnā
aa jaa.e hañsī un ko jo baiThe haiñ ḳhafā se

pahlā phuul khilā thā dil meñ
lahū meñ ḳhushbū dauḌ ga.ī thī

apne kisī amal pe nadāmat nahīñ mujhe
thā nek-dil bahut jo gunahgār mujh meñ thā

dil ġham se bhī bezār hai ma.alūm nahīñ kyoñ
ye aish bhī ab yaar hai ma.alūm nahīñ kyoñ

aalam hama dildār hai ma.alūm nahīñ kyoñ
jo ġham hai ġham-e-yār hai ma.alūm nahīñ kyoñ

koī bhī shakl mire dil meñ utar saktī hai
ik rifāqat meñ kahāñ umr guzar saktī hai

dekh kar har uzv un kā dil ho paanī bah chalā
khol chhātī be-takalluf jab nahā.eñ baaġh meñ

ummīdoñ se dil-e-barbād ko ābād kartā huuñ
miTāne ke liye duniyā na.ī ījād kartā huuñ

meñ apne dil kā mālik huuñ mirā dil ek bastī hai
kabhī ābād kartā huuñ kabhī barbād kartā huuñ

jo tum ho paas to kahtā hai mujh ko chiir ke pheñk
vo dil jo vaqt-e-duā be-zabān lagtā hai