Tags-Dil

bahār ab aa ke kyā karegī ki jin se thā jashn-e-rañg-o-naġhma
vo gul sar-e-shāḳh jal ga.e haiñ vo dil tah-e-dām bujh ga.e haiñ

hamārā murġh-e-dil chhoḌā na āḳhir us shikārī ne
gahe shāhīn pheñke us pe gaahe baaz se maarā

na uḌtā murġh-e-dil to changul-e-shāhīñ meñ kyuuñ phañstā
gayā ye ḳhasta apnī ḳhūbī-e-parvāz se maarā

dekh mire dil meñ aa kar
jhūTā huuñ yā sachchā huuñ

'ārif' is dil ke hāthoñ
martā huuñ aur jiitā huuñ

vo aa kar bhī rulāte haiñ vo jā kar bhī rulāte haiñ
dil-e-nākām mashġhūl-e-fuġhāñ yuuñ bhī hai aur yuuñ bhī

jo dil meñ daaġh raushan haiñ to ashk-e-ḳhūñ hai āñkhoñ meñ
ye manzar-e-gulsitāñ dar-gulsitāñ yuuñ bhī hai aur yuuñ bhī

chakrā rahā hai kūcha-e-gesū meñ jā ke dil
mañDlā rahī hai maut musāfir ke ās-pās

āñkhoñ meñ us ke partav haiñ
dil meñ jo tasvīr lagī hai

dil choT sahe aur uf na kare ye zabt kī manzil hai lekin
sāġhar TuuTe āvāz na ho aisā to bahut kam hotā hai

ġhunche ke chaTakne pe na gulshan meñ ḳhafā ho
mumkin hai kisī TuuTe hue dil kī sadā ho

us ke bayān se hue har-dil-azīz ham
ġham ko samajh rahe the chhupāne kī chiiz ham

vo gahrā.ī meñ kitne utre haiñ dil kī
sabhī se chhupānā paḌā zindagī meñ

dil ko dil se raah hai to jis tarah se ham tujhe
yaad karte haiñ kare yuuñ hī hameñ bhī yaad tū

dil tirā faulād ho to aap ho ā.īna-vār
saaf yak-bārī sune merī agar rūdād tū

hañs hañs ke javāñ dil ke ham kyuuñ na chuneñ TukḌe
har shaḳhs kī qismat meñ in.aam nahīñ hotā

dil toḌ diyā us ne ye kah ke nigāhoñ se
patthar se jo Takrā.e vo jaam nahīñ hotā

tū ne kī ġhair se kal merī burā.ī kyūñkar
gar na thī dil meñ to lab par tire aa.ī kyūñkar

tum dil-āzār o sitamgar nahīñ maiñ ne maanā
maan jā.egī ise saarī ḳhudā.ī kyūñkar

kasrat-e-ranj-o-alam sun ke ye ilzām milā
itne se dil meñ hai itnoñ kī samā.ī kyūñkar