Tags-Dil

zamāne ke darbār meñ dast-basta huā hai
ye dil us pe maa.il magar rafta rafta huā hai

dhaḌakne lagā dil nazar jhuk ga.ī
kabhī un se jab sāmnā ho gayā

kabhī dimāġh ko ḳhātir meñ ham ne laayā nahīñ
ham ahl-e-dil the hamesha rahe ḳhasāre meñ

kahūñ to kis se kahūñ apne dil kī taklīfeñ
mire hī ġham meñ mirā ġham-shanās Duub gayā

dil meñ koī hai jis ko akasr ham ne
har ilzām hamīñ par maḌhte dekhā hai

mire jazb-e-dil ko 'māhir' koī kyā samajh sakegā
mirī shā.irī kī had se abhī duur hai zamāna

sa.ī-e-be-hāsil thī dil kī koshish-e-iḳhfā-e-rāz
kar ga.ī rusvā nigāhoñ kī pareshānī mujhe

khul nahīñ saktī faqat ik aap ke dil kī girah
varna kyā kyā gutthiyāñ aatī haiñ suljhānī mujhe

dil-e-bedār kā ab aur hī aalam hai 'ravish'
lab tak aa jaa.e fuġhān-e-saharī mushkil hai

vo maqām-e-dil-o-jāñ kyā hogā
tū jahāñ āḳhirī pardā hogā

abhī dil par haiñ jahāñ kī nazreñ
aa.ina aur bhī dhundlā hogā

ga.ī yak-ba-yak jo havā palaT nahīñ dil ko mere qarār hai
karūñ us sitam ko maiñ kyā bayāñ mirā ġham se siina figār hai

tire nisār dil-e-ġhair-mutma.in pe na jā
use jo ishq bhī miltā to imtihāñ hotā

bhaTak ga.ī hai chahār samtoñ meñ soch kyuuñ kar
ki zehn-o-dil par lagā gayā kaun ghaat likhnā

kalām terā fasurda chehroñ kā aa.ina ho
tū apne ash.ār meñ har ik dil kī baat likhnā

chaak kar siine ko pahlū chiir Daal
yuuñ hī kuchh hāl-e-dil-e-muztar khule

phir koī duur huā jaatā hai
phir koī dil ke qarīb aa.egā

bigāḌ jis se ho paidā koī bigāḌ nahīñ
so mo.ajize kī mire dil ko aas rahne lagī

dekhte dekhte vīrāni-e-dil aur baḌhī
terī tasvīr ko siine se lagā kar pūchhā

ġham musalsal ho to ahbāb bichhaḌ jaate haiñ
ab na koī dil-e-tanhā ke qarīñ aa.egā