Tags-Dil

navāh-e-dil meñ ye merī misāl jalte raheñ
ḳhas-o-gulāb nabāt-o-nihāl jalte raheñ

vo naala dil meñ ḳhas ke barābar jagah na paa.e
jis naala se shigāf paḌe āftāb meñ

vaqt se aage nikal jā.eñge jab chāheñge
dil-girafta abhī raftār sambhāle hue haiñ

sab surḳhiyāñ haiñ ḳhūn-e-vafā sī likhī huī
qissa hai dil-gudāz shahīd-e-niyāz kā

sar be-ḳhudī meñ aap ke qadmoñ pe jhuk gayā
aayā thā kuchh ḳhayāl sā dil meñ namāz kā

āñkheñ jhukā nazar na milā dil pe tiir khā
pahlā sabaq hai ishq ke rāz-o-niyāz kā

zarf āzmā.e sozish-e-sad-barq-e-tūr se
liije na imtihān dil-e-be-niyāz kā

dil kī hastī bikhar ga.ī hotī
ruuh ke zaḳhm bhar ga.e hote

banānī hai hameñ tasvīr-e-dil kāġhaz pe lekin ham
kabhī dariyā banāte haiñ kabhī sahrā banāte haiñ

itnā be-tāb na ho mujh se bichhaḌne ke liye
tujh ko ā.ankhoñ se nahīñ dil se judā karnā hai

aur dilkash huī haiñ nam āñkheñ
mīThī lagtī haiñ aur khāre meñ

apnī karte haiñ dil zamīr-o-zehan
saare afsar haiñ is idāre meñ

soch rakhā thā ishq se rañg bhareñge sher meñ
dil ne magar nahīñ kyā ishq 'ziyā' nahīñ kiyā

qais kā hāsil-e-junūñ naaqa o mahmil o hijāb
lailā-e-najd-āshnā ḳhalvat-e-dil meñ aa.e kyuuñ

ab kis se kaheñ aur kaun sune jo haal tumhāre baad huā
is dil kī jhiil sī āñkhoñ meñ ik ḳhvāb bahut barbād huā

vo apne gaañv kī galiyāñ thiiñ dil jin meñ nāchtā gaatā thā
ab is se farq nahīñ paḌtā nāshād huā yā shaad huā

benām satā.ish rahtī thī in gahrī sāñvlī āñkhoñ meñ
aisā to kabhī sochā bhī na thā dil ab jitnā bedād huā

kisī bahāne sahī dil lahū to honā hai
is imtihāñ meñ magar surḳh-rū to honā hai

mujhe jab bolnā aayā hai 'aḳhtar'
tabhī lafzoñ kī dildārī huī hai

tijārat dil kī dhaḌkan gin rahī hai
ta.alluq lutf-e-manzar tak na pahuñchā