Tags-Dil

ḳhuub mil kar gale se ro lenā
is se dil kī safā.ī hotī hai

aañch aa.egī na andar kī zabāñ tak ai dil
kitnī der aur mirī jaan kahāñ tak ai dil

had ziyāda se ziyāda kī koī to hogī
aur is hirs kā phailāv kahāñ tak ai dil

tajraba tajraba āzād rag-o-pai meñ rahā
kitnī afsurdagī hai dahr se jaañ tak ai dil

mahak uḌ jā.egī tafhīm ke lab khulne se
sahar iblāġh kā hai zabt-e-bayāñ tak ai dil

aks o ā.īne kī sūrat hai hamārā rishta
huuñ tire saath tū merā hai jahāñ tak ai dil

hairat-āsār ajab ḳhvāb liye baiThā huuñ
shāyad aa jaa.e koī merī dukāñ tak ai dil

shor se ahl-e-ḳhabar ke hai 'riyāz' āzurda
koī le jaa.e use be-ḳhabrāñ tak ai dil

shikve kī charchā hotī hai chupke hī rahnā behtar hai
dil ko jalānā dil-sozī hai ye ġham-e-duniyā ġham-ḳhvārī hai

kis kā va.ada kaun aatā hai chain se sotā hogā vo
raat bahut aa.ī hai ai dil ab nāhaq bedārī hai

tauq-e-gulū-e-dil hai zulf-e-sanam kā har ḳham
mash.hūr ye masal hai yak sar hazār saudā

sañjo rakkhī haiñ dil meñ qīmtī yādeñ magar phir bhī
bas ik nāzuk sī Thokar se ye locker TuuT jaatā hai

māñgtā huuñ maiñ ḳhudā se apne dil se dāġh-e-ishq
bādshāh-e-husn ke sikke kā toḌā chāhiye

apne dīvāne kā dil le kar ye kahtā hai vo tifl
ye khilaunā hai isī qābil ki toḌā chāhiye

iḳhtilāj-e-qalb ke daure nahīñ
ishq kī 'bismil' haiñ dil-āzāriyāñ

rahte ka.abe meñ akele kyā ham
dil lagāne ko sanam bhī to na the

jo dil meñ samā.e the vo ab shāmil-e-dil haiñ
is aa.ine meñ aks kisī kā nahīñ miltā

dil meñ to dhaḌakne kī sadā bhī nahīñ 'mushtāq'
raste meñ hai vo bhiiḌ ki rasta nahīñ miltā

raheñ dil meñ kuchh barahna hasrateñ
na āñkhoñ kī khiḌkī se jhāñkā kareñ

dil meñ aane kī bhalā aap ko dāvat maiñ duuñ
ghar ke mālik kabhī mehmān bhī ho sakte haiñ