Tags-Dil

ham ne terī jafā ke parde meñ
ḳhud bhī dil par bahut sitam Dhāyā

sadā se ek sadā aa rahī hai kānoñ meñ
aziim kaam hai logoñ ke dil meñ ghar karnā

dil kā mausam zard ho to kuchh bhalā lagtā nahīñ
koī manzar koī chehra ḳhushnumā lagtā nahīñ

har-vaqt ulajhtā hai ye dil zulf-e-dotā meñ
samjhātā huuñ kam-baḳht na paḌ jā ke balā meñ

kahtī hai ye tauba ki gunāhgār maiñ behtar
ai dil kabhī bhūle se bhī paḌnā na riyā meñ

''jo tū nahīñ thī to aur bhī the jo tū na hogī to aur hoñge''
kisī ke dil ko jalā ke kahte ho merī jaañ ye muhāvara hai

tum ne ab siikh liyā mujh ko satā.e rakhnā
ek mahshar sā mire dil meñ uThā.e rakhnā

aisā karnā ki mire naam ko dil par likh kar
parda-e-zehn ko tauqīr dilā.e rakhnā

manzil-e-dil milī kahāñ ḳhatm-e-safar ke baad bhī
rahguzar ek aur thī rāhguzar ke baad bhī

dil meñ the laakh vasvase jalva-e-āftāb tak
rah ga.ī thī jo tīrgī nūr-e-sahar ke baad bhī

haar ke bhī nahīñ miTī dil se ḳhalish hayāt kī
kitne nizām miT ga.e jashn-e-zafar ke baad bhī

pahroñ se dhaḌakne kī bhī aatī nahīñ āvāz
kyā jāniye kyā hai dil-e-nāshād kā aalam

bahāreñ aur vo rañgīñ nazāre yaad aate haiñ
vo dilkash vādiyāñ vo māh-pāre yaad aate haiñ

vo jhīleñ vo chaman vo ġhuncha-o-gul aur vo sabza
mire dil ko vo manzar pyāre pyāre yaad aate haiñ

dil se kyā pūchhtā hai zulf-e-girah-gīr se pūchh
apne dīvāne kā ahvāl tū zanjīr se pūchh

hañgām-e-qanā.at dil-e-murda huā zinda
mazmūn-e-qum e.ajāz-e-lab-e-nān-e-javīñ thā

maiñ ne fasīl-e-shab ko muqaddar nahīñ kiyā
tīra-shabī meñ ghir ke bhī dil arjumand thā

dil jigar kī phakaḌiyāñ aahoñ ke tāroñ meñ piro
baiTh kar dokān-e-ġham par phuul vaalā ho gayā

baaġh meñ sarmā thā aur thī yād-e-dildār-e-do-rañg
mujh kuuñ har barg-e-gul-e-ra.anā doshālā ho gayā

bas ek hī kaifiyyat-e-dil sub.h-o-masā hai
har lamha mirī umr kā zanjīr-ba-pā hai