Tags-Dil

roz miltā hai koī dil ko lubhāne vaalā
phir bhī tū hī mirā mahbūb-e-nazar hai kyuuñ hai

lag ga.ī aag agar ghar ko to andesha kyā
sho.ala-e-dil to nahīñ hai ki bujhā bhī na sakūñ

hañs ke bulvā.iye miT jā.egā sab dil kā gila
kyā tasavvur hai tumhārā ki miTā bhī na sakūñ

mujhe apnī pastī kī sharm hai tirī rif.atoñ kā ḳhayāl hai
magar apne dil ko maiñ kyā karūñ use phir bhī shauq-e-visāl hai

vo ḳhushī nahīñ hai vo dil nahīñ magar un kā saaya sā ham-nashīñ
faqat ek ġham-zada yaad hai faqat ik fasurda ḳhayāl hai

kise nazr deñ dil-o-jāñ baham ki nahīñ vo kākul-e-ḳham-ba-ḳham
kise har-nafas kā hisāb deñ ki shamīm-e-yār bhī ab nahīñ

vo hujūm-e-dil-zadgāñ ki thā tujhe muzhda ho ki bikhar gayā
tire āstāne kī ḳhair ho sar-e-rah-e-ġhubār bhī ab nahīñ

taskīn-e-ġham-e-dil ke liye jiitā huuñ
jiitā bhī nahīñ, chāk-e-jigar siitā huuñ

chhupā.e chhuptī nahīñ un se kohnagī dil kī
na.e libās vo har-dam badalte rahte haiñ

qayām kartā nahīñ dil meñ chaar din koī
makīn ḳhāna-e-be-dar badalte rahte haiñ

jo tasvīr-e-ḳhyālī naqsh dil par ho ga.ī hotī
to apnī zaat meñ har-dam tirī jalva-garī hotī

tumhārā aa.ina ban kar jo dil pesh-e-nazar rahtā
tumhīñ tum jalva-gar hote na sūrat dūsrī hotī

naqsh-e-tilism merā dil-e-dāġh-dār thā
thā din ko phuul raat ko sham-e-mazār thā

yādash-ba-ḳhair yaad haiñ dil kī musībateñ
pahlū meñ ik sitam-zada-e-rozgār thā

allāh re shām-e-ġham mire dil kī shikastagī
tāroñ kā TūTnā bhī mujhe nāgavār thā

be-vafāoñ ko hāl-e-dil apnā
chhoḌiye bhī sunā ke kyā hogā

dil kī dillī luT ga.ī is ke aivānoñ meñ ġhadar machī
ḳhuddārī ke muġhal shahzāde shahr meñ Thaliyā Dhote haiñ

dil ke ziyāñ kā sabab kyā pūchho un tūfānoñ ko dekho
jin ke bhañvar sāhil ke safīnoñ ko bhī aan Dubote haiñ

zaḳhm-e-dil dāġh-e-jigar dāġh-e-tamannā kī qasam
chāñd se phuul se Dar ham ko yahāñ hotā hai

hamāre dil meñ yādoñ ko salīqe se rakhā jaa.e
ki is kamre meñ phūloñ ko salīqe se rakhā jaa.e