Tags-Dil

ye bhañvar haiñ bahr-e-hayāt ke maiñ huuñ ḳhasta-hāl-o-shikasta-o-dil
mirī Dagmagātī hai naav ab kahīñ miltā mujh ko karāñ nahīñ

ġham-e-dil hī merā nikāl do mirī zindagī se jo tum agar
to vo dāstāñ hī kuchh aur hai mire hāl-e-dil kā bayāñ nahīñ

maiñ sunā.ūñ kis ko ye hāl-e-dil maiñ dikhā.ūñ kis ko ye dard-o-ġham
maiñ huuñ aisī hālat-e-zār meñ ki ḳhud apnā mujh ko gumāñ nahīñ

dil hī gayā to kaun butoñ kā kare ḳhayāl
ka.abe ke saath sañg parastī chalī ga.ī

go dil ke badle daulat-e-duniya-o-dīñ milī
to bhī ye jins haath se sastī chalī ga.ī

mahfil-e-ġhair meñ vo mujh ko mileñ to ai dil
kis tarah zikr tirā ai dil-e-nāshād karūñ

mā-sivā tere nazar meñ koī jachtā hī nahīñ
ḳhāna-e-dil meñ tujhe kyuuñ na maiñ ābād karūñ

zaḳhm hī zaḳhm mohabbat haiñ mire dil meñ agar
sochtā huuñ ki bayāñ kaise ye rūdād karūñ

dil azal hī se hai maa.il jo hasīnoñ kī taraf
kyuuñ mohabbat ke gharoñdoñ ko maiñ barbād karūñ

shab kī tanhā.ī meñ aksar yahī sochā hai 'nazīr'
yaad kar kar ke tujhe dil ko to ab shaad karūñ

tirī nigāh kiran thī to merā dil shabnam
tirī nigah se bhī dil kā mo.āmla na huā

jo dil meñ thī nigāh sī nigāh meñ kiran sī thī
vo dāstāñ ulajh ga.ī vazāhatoñ ke darmiyāñ

ye kaisī chheḌ hai kyoñ pūchhte ho mudda.ā-e-dil
hue jab mudda.ī ke tum suno kyuuñ mudda.ā merā

dil-āzārī kā baa.is ho nahīñ saktī jafā terī
vahī hai nā-murādī par bhī andāz-e-vafā merā

tū ne kuchh bhī na kahā ho jaise
mere hī dil kī sadā ho jaise

ba.ad ranjish ke gale milte hue ruktā hai dil
ab munāsib hai yahī kuchh maiñ baḌhūñ kuchh tū baḌhe

dekhā hai jin ne rū-e-dil-afroz ko tire
be-shak nazar meñ bāġh-e-iram us kī ban lagā

phūloñ kī tarah jism hai patthar kī tarah dil
jaane ye hasīñ log vafā kyuuñ nahīñ karte

jī meñ hai chiir ke siina maiñ nikālūñ dil ko
tā kisī Dhab se to pahlū kā ye kāñTā nikle

jāñ-kanī meñ hai taḌaptā dil-e-betāb 'surūr'
mere iisā se kaho yahāñ bhī kabhī aa nikle