Tags-Dil

kartā huuñ terī zulf se dil kā mubādala
har-chand jāntā huuñ ye saudā burā nahīñ

josh-e-junūñ meñ sar pe uḌā.eñ kahāñ se ḳhaak
dil kyā gayā ġhubār hī jī meñ rahā nahīñ

dil o nigāh kā ye fāsla bhī kyuuñ rah jaa.e
agar tū aa.e to maiñ dil ko aañkh meñ rakh luuñ

us bevafā pe marne ko āmāda dil nahīñ
lekin vafā kī zid hai ki mar jaanā chāhiye

mirī dāstāñ bhī ajiib hai vo qadam qadam mire saath thā
jise rāz-e-dil na batā sakā jise dāġh-e-dil na dikhā sakā

sāmne phailā huā dasht kā sannāTā hai
ab kahāñ bach ke chaleñ ham dil-e-saudā.ī se

ban gayā ek qayāmat dar-e-dil tak aanā
aur guzarnā hai abhī dhyān kī añgnā.ī se

phuuT bahne lage Thokar se phaphole dil ke
dard ehsās ke paanī se nikal aayā hai

dīvāne chāhtā hai agar vasl-e-yār ho
terā baḌā raqīb hai dil is se raah rakh

dil ke andar ik zarā sī be-kalī hai aaj bhī
jo mire afkār meñ ras gholtī hai aaj bhī

miTTī kī gavāhī se baḌī dil kī gavāhī
yuuñ ho to ye zanjīr ye zindāñ bhī mirā hai

dhaḌak rahā hai har ahl-e-vafā ke siine meñ
hamārā dard bharā dil kahāñ nahīñ miltā

dil-e-shikasta ko le jā.iye kahāñ 'bāsit'
dimāġh-e-naḳhvat-e-shīsha-garāñ nahīñ miltā

hoñToñ pe khil uThā to huā dāġh-e-dil duā
kyā kyā suḳhan ke silsile bante chale ga.e

kis sūrat-e-sabāt pe Thahrī nigāh-e-dil
ik raqs-e-rau meñ TūTte bante chale ga.e

na vafāoñ pe nazar hai na jafāoñ kā malāl
dil meñ vo dard vo ehsās kahāñ hai ki jo thā

hai tirī yaad nashāt-e-shab-e-hijrāñ ki jo thī
haañ tirā dard qarār-e-dil-o-jāñ hai ki jo thā

jalva-e-yār se mahrūm hai ġham-ḳhāna-e-dil
ye vahī tīra-o-tārīk makāñ hai ki jo thā

vaqt ke saath badaltā nahīñ jāfar-'tāhir'
ye vahī soḳhta-dil soḳhta-jāñ hai ki jo thā

halqa-e-sher se guzrūñgā mohabbat meñ 'sa.īd'
dil ke jazbāt ko alfāz meñ laatā huā maiñ