Tags-Aahat

kyuuñ aahaT par chaukūñ maiñ kis ko dekhūñ
be-dastak hī aayā jab vo aayā hai

'humairā' dhyān rakhnā Dūbte sūraj kī aahaT kā
sadā chaḌhtī utartī dhuup kī paimā.isheñ karnā

tire shahr kī sard galiyoñ kī aahaT
mire ḳhuun meñ sarsarā.ī

tire qadmoñ kī aahaT gūñjtī hai
vahīñ tak maiñ ga.ī huuñ tū jahāñ tak

aap ke qadmoñ kī aahaT se shāyad ḳhvāb se jaag uThe
soī huī vīrān udāsī kamroñ meñ dālānoñ meñ

ho sub.h-e-raushan ki shām-e-rañgīñ kisī meñ koī kashish nahīñ hai
har ek ḳhvāhish dhuāñ dhuāñ hai na koī aahaT na koī halchal

mire tasavvur kī nīlgūñ jhiil meñ ek taarā jahāñ girā thā
vahāñ ḳhamoshī balā-e-jāñ hai na koī aahaT na koī halchal

lahū uchhalne kā shor jaise fazā meñ gūñjā kabhī nahīñ thā
ye hukm-e-shahr-e-sitamgarāñ hai na koī aahaT na koī halchal

fazā kī raunaq zamīñ kī saj dhaj qalam kī jumbish pe munhasir hai
ajiib pābandī-e-zabāñ hai na koī aahaT na koī halchal

hamārī bastī meñ har taraf inqalāb-e-nau kā amal thā jaarī
na jaane ye kaun sā jahāñ hai na koī aahaT na koī halchal

sukūt siine meñ aisā kab thā gumāñ bhī guzre na dhaḌkanoñ kā
ḳhudā hī jaane ki dil kahāñ hai na koī aahaT na koī halchal

maiñ apne andar jahāñ chhupā huuñ koī na pahuñchā vahāñ abhī tak
sukūt har samt be-karāñ hai na koī aahaT na koī halchal

palak palak sail-e-ġham ayaañ hai na koī aahaT na koī halchal
kasak ye kaisī darūn-e-jāñ hai na koī aahaT na koī halchal

baḌhūñ to aage dhueñ ke bādal haTūñ to pīchhe balāoñ ke dal
ye kaisā manzar yahāñ vahāñ hai na koī aahaT na koī halchal

hujūm-e-saut-o-sadā saḌak par julūs ban kar nikal paḌā hai
samā.atoñ kā ye imtihāñ hai na koī aahaT na koī halchal

na.e zamāne kī maiñ bashārat kā muntazir huuñ magar abhī tak
hayāt aise ravāñ-davāñ hai na koī aahaT na koī halchal

ḳhanjaroñ par lahū kī sad aahaT
sau zabānoñ meñ zā.iqa taqsīm

hujra-e-zāt meñ sannāTā hī aisā hai ki dil
dhyān meñ gūñjtī aahaT pe uchhal paḌtā hai

hamārī āñkhoñ meñ jalne vaale nuqūsh baaqī haiñ
kaan mausam kī garm aahaT se chauñk uThte haiñ

ek ujḌe hue vīrān se ghar se 'almās'
koī aahaT koī dastak sī magar aatī hai