Tags-Aarzoo

dil meñ ik ma.asūm sī ye aarzū bhī hai 'sahar'
vo muḳhātab mujh se ho aur maiñ use dekhā karūñ

har nafas vaqf-e-ārzū kar ke
kuchh bhī paayā na justujū kar ke

kahāñ se tezī-o-tundī bharī ye sho.alagī aa.ī
ki jis ne aarzū o shauq kī zanjīr pighlā.ī

bāzār-e-ārzū meñ kaTī jā rahī hai umr
ham ko ḳharīd le vo ḳharīdār chāhiye

de ke koī muskurāhaT kā kafan
aarzū ko dil meñ hī dafnā gayā

murġh-e-be-bāl-o-par huuñ ai sayyād
aarzū hai kisī rihā.ī kī

sar-e-maqtal-e-shab-e-ārzū rahe kuchh to ishq kī aabrū
jo nahīñ adū to 'farāz' tū ki nasīb-e-dār koī to ho

maiñ aur tum se tark-e-mohabbat kī aarzū
dīvāna kar diyā hai ġham-e-rozgār ne

mahmil-e-lailā ke pīchhe gard thī aur qais thā
is sarāb-e-ārzū meñ hijr kī izzat ga.ī

duniyā se kuchh lagāo na uqbā kī aarzū
tañg aa ga.e haiñ is dil-e-be-mudda.ā se ham

aarzū bhī to kar nahīñ aatī
dil meñ hai hoñTh par nahīñ aatī

ḳhamoshiyoñ ke bichhaune pe shab ke pichhle pahar
tirā ḳhayāl na.ī aarzū ubhārtā hai

ḳhayāl-e-dost na hasrat na aarzū na ummīd
ye dil hai ab kisī ujḌe hue chaman kī tarah

hazār baar kiyā ḳhūn-e-ārzū ham ne
jabīn-e-dahr pe phir bhī rahe shikan kī tarah

ajab nahīñ ki sar-e-shahr-e-ārzū 'nādir'
hamārā dil bhī jale sham-e-anjuman kī tarah

falsafa mere sahīfe meñ hai hikmat bhī hai
aarzū bhī mire āġhosh meñ hasrat bhī hai

aarzū se nikal ke dekh mujhe
ahd-o-paimān meñ nahīñ huuñ maiñ

jamāl-e-shāhid-e-mutlaq se jis ko matlab hai
vo dil sa.iid nazar as.ad aarzū mas.ūd

zikr-e-takmīl-e-ārzū chheḌo
raat yūñhī basar na ho jaa.e

thā gulāb maiñ thī ye aarzū tire gesuoñ meñ khilūñ kabhī
nahīñ khil sakā to ye jaan le ye tirī hai merī ḳhatā nahīñ