dil pe jab terā tasavvur chhā gayā
zindagī kā aa.ina dhuñdlā gayā
umr-bhar koī ḳhushī aa.ī na raas
ruuTh kar us dil se to achchhā gayā
aadmī ke aa.ine meñ dekh kar
apnī sūrat se ḳhudā sharmā gayā
maiñ to ro ro kar sadā khultā rahā
tū ai gul hañsne pe bhī murjhā gayā
de ke koī muskurāhaT kā kafan
aarzū ko dil meñ hī dafnā gayā
le ke aa.e the muqaddar qais kā
saath apne har jagah sahrā gayā
dil to thā shīshe kā go 'sīmāb' kā
pattharoñ ke shahr meñ pathrā gayā