Tags-But

but ulajhte haiñ roz mujh se 'riyāz'
roz mujh bā-ḳhudā se hotī hai

dosh-ba-dosh dosh thā mujh se but-e-karishma-kosh
parda dar ḳhiyām-e-aql-e-raḳhna-gar harīm-e-hosh

us but ke liye maiñ havas-e-hūr se guzrā
is ishq-e-ḳhush-anjām kā āġhāz to dekho

kiyā hai kyuuñ 'bahr' se kinārā tirī judā.ī ne mujh ko maarā
are but-e-sañg-dil ḳhudā-rā bulā le mujh ko bhī to jahāñ hai

barā-e-zar muttaqī bane haiñ husūl ke mas.ale chhine haiñ
murīd jo haiñ vo but bane haiñ matā-e-islām rā.egāñ hai

jhukte haiñ us ko har jagah maujūd pā ke 'soz'
dil meñ hamāre ka.aba-o-but-ḳhāna to nahīñ

but-kada nazdīk ka.aba duur thā
maiñ idhar hī rah gayā majbūr thā

har kas-o-nā-kas se kyā miltī nigāh
apnī āñkhoñ meñ but-e-maġhrūr thā

kāñptā hai vo dil ġhazab se tire
jis ne ai but ḳhudā kā Dar na kiyā

ilāhī ek dil kis kis ko duuñ maiñ
hazāroñ but haiñ yaañ hindostān hai

maiñ vo kāshī kā musalmāñ huuñ ki jis ko ai 'nazīr'
apne ghere meñ liye rahte haiñ but-ḳhāne ka.ī

kāfir-e-ishq huuñ maiñ sab se mohabbat hai mujhe
ek but kyā ki samāyā hai kalīsā dil meñ

bas-ki us but kī tabī.at hai zamāne se ḳhilāf
sub.h poshāk siyah hai to sar-e-shām safed

rātoñ ko but baġhal meñ haiñ qur.āñ tamām din
hindū tamām shab huuñ musalmāñ tamām din

hai ḳhauf kuchh to mauj-e-talātum kā bhī magar
ham log zaḳhm-ḳhurda but-e-nāḳhudā ke haiñ

kyā mājrā hai ai but-e-tauba-shikan ki aaj
charche tirī galī meñ kisī pārsā ke haiñ

dil mirā kostā rahtā hai usī pal ko 'humā'
ek patthar se bane but ko thā puujā jis dam

ne but-kada se kaam na matlab haram se thā
mahv-e-ḳhayāl-e-yār rahe ham jahāñ rahe

mohabbat nibhe but ki ho ḳhāna-e-dil
hamārā tumhārā tumhārā hamārā

sar jhukā.e hue baiThe haiñ jo ka.abe meñ 'qamar'
aise hote haiñ nikāle hue but-ḳhānoñ ke