Tags-Budhapa

hamārī be-ma.āshī ne hameñ ye din dikhā.e haiñ
javāñ chehroñ pe bhī aksar buḌhāpā dekhtā huuñ maiñ

piyā ab to palaT aa dekh aa.ī
safedī sar pe chehre par buḌhāpā

nikhartā buḌhāpā machaltī javānī
kahīñ but-garī hai kahīñ but-parastī

ḳhvāb meñ kal shab
merā buḌhāpā

sarmā kī chāñdnī thī javānī guzar ga.ī
jhulsā rahī hai dhuup buḌhāpā Thahar gayā

Dhalne lagī javānī jo aa.ī thī chaar din
Thahrā buḌhāpā qabr talak rahbarī ke saath

buḌhāpā ho to ho us rabt meñ kyuuñ kar ḳhalal aa.e
mirī yās-o-tamanna bachpane se saath khelī hai

gardūñ kī tarah ḳham huā qad qaus-e-quzah kā
khīñchā hai magar zo.af suuñ kaivān buḌhāpā

az bas-ki huā haigā guzar fasl-e-ḳhizāñ kā
raunaq nahīñ rakhtā hai gulistān buḌhāpā

joban ke bhavan meñ lagī hai ātish-e-garmī
chhiḌke hai tahūr aab zamistān buḌhāpā

sad-haif ki kamzor hai chashmān buḌhāpā
sustī satī jumbish meñ hai dandān buḌhāpā

ash.ār haiñ tārīf sapedī kī sarāpā
is vāste rañgīñ nahīñ dīvān buḌhāpā

lazzat nahīñ detā hai dahan biich kasū ke
ai 'mubtalā' kyā sard haigā naan buḌhāpā

ġhaflat kī ruī duur na kī shīsha-e-dil suuñ
mai-ḳhāne meñ mastāñ ne sun ilhān buḌhāpā

ab bulbul-e-jāñ tañg huā tan ke qafas meñ
parvāz kare dekh ke zindān buḌhāpā

tasbīh-o-musallā-o-asā ainak-o-ra.asha
joban ne diyā bhej ye sāmān buḌhāpā

amrāz kī afvāj kā yūrish hai badan par
is mulk meñ maġhlūb hai sultān buḌhāpā

arbal ke bhañvar meñ ga.ī hai Duub javānī
jis vaqt uThā jag mane tūfān buḌhāpā

samay kī āñkhoñ se dekhiye to har ek khañDar meñ chhupe mileñge
kahīñ pe bachpan kahīñ javānī kahīñ buḌhāpā kahīñ udāsī

phir rahā hai mirī nazroñ meñ sarāpā terā
āh-o-qaid-e-sitam aur buḌhāpā terā