Tags-Birthday

ye be-ḳhudī ye laboñ kī hañsī mubārak ho
tumheñ ye sālgirah kī ḳhushī mubārak ho

'prem' is yug kī sāl-girah par aur bhalā kyā tohfa dete
chāñd kī dilkash dhartī se bhī ham ne DhūñDh nikāle patthar

muñh-zor zamānoñ kī zarā khīñch le bāgeñ
mere kisī bichhḌe hue kī sāl-girah hai

ye to ik rasm-e-jahāñ hai jo adā hotī hai
varna sūraj kī kahāñ sālgirah hotī hai

yahī vo din the jab ik dūsre ko paayā thā
hamārī sāl-girah Thiik ab ke maah meñ hai

dard kī sāl-girah ḳhair se guzre 'gauhar'
aa ga.ī raat vahī chāñd-gahan hone kī

sālgirah ḳhargosh manā.e
jañgal ke sab sāthī aa.e

us ke nīche
sālgirah kā cake sajā thā

apnī pichhlī sāl-girah par maiñ ye soch rahā thā
kitne diye jalā.ūñ maiñ?

hasīn chehre kī tābindagī mubārak ho
tujhe ye sāl-girah kī ḳhushī mubārak ho

sālgirah par kitnī nek tamannā.eñ mausūl huiiñ
lekin in meñ ek mubārakbād abhī tak baaqī hai

shā.er kā jashn-e-sālgirah hai sharāb lā
mansab ḳhitāb rutba unheñ kyā nahīñ milā