Tags-Zulf

murġh-e-dil ke phañsāne ko mere
dāna-o-dām zulf o ḳhaal huā

kyuuñ na af.ī chale har ek jagah makḌā kar
na paḌā us ko tirī zulf-e-siyah-fām se kaam

phailā hai jaal baam pe zulf-e-darāz kā
totā uḌe na haath se ahl-e-niyāz kā

tumhārī zulf-e-siyah pe tanqīd kis se likhvāūñ tum hī bolo
'shrī-ibādat-barelvī' ko maiñ taar de kar bulā rahā huuñ

āñkhoñ pe vo zulf aa rahī hai
kaalī jaadū jagā rahī hai

Dar ḳhudā siiñ ḳhuub na.iiñ ye vaqt-e-qatl-e-ām kuuñ
sub.h kuuñ kholā na kar is zulf-e-ḳhūn-āshām kuuñ

aañkh ke laḌte tirī āshob sā barpā huā
zulf ke dirham hue ik jam.a barham ho gayā

kūcha-e-zulf ko katrā ke gayā dil ruḳh par
us ne vo rasta-e-pur-ḳhauf-o-ḳhatar chhoḌ diyā

aa gayā dil meñ jo aalam kā musaḳhḳhar karnā
zulf ko chehre pe hañgām-e-sahar chhoḌ diyā

uljhī thī zulf us ne sañvārā sañvar ga.ī
shāne ko kyā ḳhabar ye balā kis ke sar ga.ī

chhū aa.ī hai un kī zulf 'mahshar'
andāz to dekhiye sabā ke

fidā dil zulf-e-shab-gūñ par tumhārī
kahīñ aafat kā maarā ho na jaa.e

zulf-o-ruḳh kī bāteñ thiiñ din thā aur rāteñ thiiñ
sub.h kitnī rañgīñ thī shaam kyā suhānī thī

na koī yaar na hamdam na koī hamrāhī
tumhārī zulf kā saaya to ḳhair saaya huā

zulf bikhrī hai shaam se pahle
ye adā kyā hai ye adā kyuuñ hai

kabhī khole to kabhī zulf ko bikhrā.e hai
zindagī shaam hai aur shaam Dhalī jaa.e hai

ġhairat-e-gul hai tū aur chāk-garebāñ ham haiñ
rashk-e-sumbul hai tirī zulf pareshāñ ham haiñ

mirī chashm-e-husn hī meñ tire ruḳh kī tābisheñ haiñ
mire halqa-e-nazar meñ tirī zulf-e-mushk-bū hai

rū-ba-rū us zulf ke dām-e-balā kyā chiiz hai
us nigah ke sāmne tīr-e-qazā kyā chiiz hai