Tags-War

ḳhatm ho jañg ḳharābe pe hukūmat kī jaa.e
āḳhirī māraka-e-sabr hai ujlat kī jaa.e

har qadam dast-o-garebāñ hai yahāñ ḳhair se shar
ham bhī kis mārka-e-jañg-o-jadal meñ aa.e

jañg apnoñ se hai to dil ko kināre kar luuñ
rāste meñ yahī talvār na haa.el ho jaa.e

akele jañg laḌī jiit lī to sab ne kahā
pahuñchte ham bhī agar tū hameñ ḳhabar kartā

jañg jaarī hai chaar āñkhoñ meñ
ho rahā hai qitāl āñkhoñ meñ

har ik nafas pe guzartā hai ye gumāñ jaise
charāġh le ke havāoñ se jañg par jaanā

ham ne maanā jañg kaḌī hai
sar phūTeñge ḳhuun bahegā

'joshish' us arbada-jū turk-e-sitam-gār ne aaj
āshtī kī hai baḌī jañg-o-jadal se ham se

maiñ ne jis shaḳhs kī barsoñ se taraf-dārī kī
us ne mere hī liye jañg kī tayyārī kī

raste se mirī jañg bhī jaarī hai abhī tak
aur paañv tale zaḳhm kī vahshat bhī vahī hai

aañkh se aañkh hai laḌtī mujhe Dar hai dil kā
kahīñ ye jaa.e na is jañg-o-jadal meñ maarā

ye jo mujh se aur junūñ se yaañ baḌī jañg hotī hai der se
so kuchh aisī Dhab se laḌā.ī hai laḌe sher jaise ki sher se

hālāt badal sakte haiñ karvaT kisī lamhe
ho jañg to ghoḌe ko sadhāyā nahīñ jaatā

vahāñ hamāre qabīloñ meñ jañg chhiḌ ga.ī thī
so thar ke bhāge hue aa base the kel meñ ham

jañg dhartī pe sitāroñ ke liye jaarī hai
haif-sad-haif ki har shai pe junūñ taarī hai

jañg-dar-jañg sulagte haiñ sadāoñ ke badan
sabz rātoñ ke siyah ḳhuun se tar hai dāman

ek sard jañg hai ab mohabbateñ kahāñ
TūTte hue tilism phailtā huā dhuāñ

maidān-e-jañg aane se pahle palaT ga.e
nikle the le ke haath meñ talvār sab ke sab

āñkheñ laḌīñ tujh se maiñ huā qatl
in turkoñ ne jañg-e-zargarī kī