Tags-Waqt

zindagī tujh ko bhulāyā hai bahut din ham ne
vaqt ḳhvāboñ meñ gañvāyā hai bahut din ham ne

qa.ar-e-badan meñ ruuh pukārī ye vaqt-e-naza.a
muddat ke baad uThte haiñ ham is makāñ se aaj

ai ġhanī de sīm-o-zar vaqt-e-balā
māl-e-duniyā jaan kī ḳhairāt hai

ghar se nikle ho nihatte vaqt-e-qatl
ye bhī bahr-e-qatl-e-āshiq ghaat hai

ye kyā mahal hai ki aaj karte ho shaiḳh jī zikr-e-zohd-o-taqvā
yahī hai vājib ki hoñ gul-o-mul kī vaqt-e-fasl-e-bahār bāteñ

vaqt bhī sa.ī-e-madāva-e-alam kar na sakā
jab se tum bichhḌe ho ḳhud vaqt hai Thahrā Thahrā

vaqt kā mai-kada tasvīr-e-sukūt
sañg be-zarb tab āzurda subū

maiñ salīb-e-vaqt pe kab se huuñ mujhe ab to is se utaar lo
ki sazā bhī kaaT chukā huuñ maiñ mirā faisla bhī huā nahīñ

vo havā de rahe haiñ dāman kī
haa.e kis vaqt niiñd aa.ī hai

vaqt ke dast-e-girāñ-bār se māyūs na ho
kis ko ma.alūm hai kyā honā hai aur kyā ho jaa.e

paḌī huī hai gard sī jo vaqt par
ye chashm-e-ḳhvāb-zād se girī na ho

ye vaqt aa.e to be-irāda
kabhī kabhī maiñ bhī dekhtā huuñ

vaqt kī barf hai har taur pighalne vaalī
din bhī hai zer-e-safar shaam bhī Dhalne vaalī

hai ajab vaqt kī holī ki har ik chakkar par
suuī chehre pe nayā rañg hai malne vaalī

masrūf burā vaqt mujhe rakhtā hai 'betāb'
yaad achchhe dinoñ kī kabhī aane nahīñ detā

vaqt le aayā hai ḳhud had meñ use der saver
jis ne bhī qad se sivā apnī anā rakkhī hai

ilm se jis ke mujhe mil sake manzil kā nishāñ
vaqt ne mujh se vahī baat chhupā rakkhī hai

vaqt ne dil kī tabī.at meñ vafā rakkhī hai
kulfat-e-āgahī phir us kī sazā rakhī hai