Tags-Waqt

is jazba-e-dil ke baare meñ ik mashvara tum se letā huuñ
us vaqt mujhe kyā lāzim hai jab tujh pe mirā dil aa jaa.e

ai rahbar-e-kāmil chalne ko tayyār to huuñ par yaad rahe
us vaqt mujhe bhaTkā denā jab sāmne manzil aa jaa.e

ai dil kī lagī chal yūñhī sahī chaltā to huuñ un kī mahfil meñ
us vaqt mujhe chauñkā denā jab rañg pe mahfil aa jaa.e

un ke lab haiñ mirī shikāyat hai
kitnā badlā hai vaqt-e-hairat hai

vaqt ke saath jo tabdīl huā kartā hai
aa.ina aa.ina chehrā mirā dekhā huā hai

vo koī vaqt thā jab dil thā baḌā nāzuk sā
ab to siine meñ rakhā hai koī patthar jaise

'nushūr' is vaqt bhī duniyā asīr-e-mulak-o-daulat hai
abhī fikr o nazar tā-hadd-e-insānī nahīñ jaatī

vaqt se pahle bachchoñ ne chehroñ pe buḌhāpā oḌh liyā
titlī ban kar uḌne vaale soch meñ Duube rahte haiñ

zindagī palkeñ bichhā de ki baḌī mushkil se
maut ne tere liye vaqt nikālā hogā

muddatoñ ghaav kiye jis ke badan par ham ne
vaqt aayā to usī ḳhvāb ko talvār kiyā

vaqt ke zulmat-kade meñ hai bhalā kis ko davām
ab kahāñ se lā.ūñ maiñ terī nishānī kī kitāb

gar nujūmī koī paḌh saktā hai hāthoñ kī lakīreñ
maut kā merī use tai vaqt batlānā paḌegā

vaqt ḳhud kā ḳhud-baḳhud hī ab hameñ laanā paḌegā
valvale meñ aa ke ham ko ḳhuun mahkānā paḌegā

roktā huuñ to ye ruktā hī nahīñ hai 'ejāz'
mujhe har roz-o-shab-e-vaqt havā lagtā hai

vaqt guzartā jaatā aur ye zaḳhm hare rahte to
baḌī hifāzat se rakkhī hai terī nishānī kahte

jab koī hasīñ hotā hai sargarm-e-navāzish
us vaqt vo kuchh aur bhī aate haiñ sivā yaad

vaqt ke shor meñ yuuñ chīḳh rahe haiñ lamhe
bahte paanī meñ koī Duub rahā ho jaise

vaqt ke bahte dariyā meñ
kitne sūraj Duube the

vaqt kahāñ muTThī meñ aane vaalā thā
lekin ham ne bāñdh liyā tasvīroñ meñ

samajh meñ vaqt kā aayā karishma
nazar ḳhud par jo Daalī hai dinoñ ba.ad