Tags-Wajood

tirā vajūd sarāsar hai multafit to phir
tire gurez ne kyuuñ ab talak kamī nahīñ kī

ajab hisār haiñ sab apne gird khīñche hue
vajūd kī vahī dīvār dar kahāñ kholīñ

kā.enāt-o-nūr-o-zulmat hai mirā apnā vajūd
raushnī meñ bhī mirā saaya numā.inda rahā

be-chehragī kī bhiiḌ meñ gum hai mirā vajūd
maiñ ḳhud ko DhūñDhtā huuñ mujhe ḳhad-o-ḳhāl de

matlab yahī huā ki mirā bhī vajūd hai
us ā.īna meñ saaf nazar aa rahā huuñ maiñ

jab vajūd kā rishta had pe maut kī pahuñche
paar us ke jaane meñ vaqt chāhiye kuchh to

bachā ke aañkh maiñ ḳhud apnī khoj meñ niklūñ
mire vajūd meñ ek chor rāsta ho jaa.e

ye kaun mere alāva mire vajūd meñ hai
ki ek shor balā kā mire vajūd meñ hai

maiñ ek mauj meñ huuñ jab se raushnī milī hai
ye lag rahā hai ki duniyā mire vajūd meñ hai

jo buuñd buuñd jalātī hai tan badan merā
vo āgahī kī tamannā mire vajūd meñ hai

koī charāġh mirī samt bhī ravāna karo
bahut dinoñ se añdherā mire vajūd meñ hai

is ek fikr ne ghole mirī hayāt meñ ġham
tū duur kyuuñ nahīñ jaatā mire vajūd meñ hai

ye kis ne merī nazar ko banāyā ā.īna
ye nuur kis ne ujālā mire vajūd meñ hai

maiñ band aañkh se duniyā ko dekh saktā huuñ
ik aisī chashm-e-tamāshā mire vajūd meñ hai

mukammal nahīñ yuuñ to koī vajūd
kamī mujh meñ hai kaun sī baat kī

tumheñ mujh meñ kyā nazar aa gayā jo mirā ye ruup banā ga.e
vo tamām log jo ishq the vo mire vajūd meñ aa ga.e

hai vajūd us kā jo kāġhaz pe kare sābit ye
ba.az auqāt hai kāġhaz baḌā auqāt se ab

payām aayā hai phir ek sarv-qāmat kā
mire vajūd ko khīñche hai daar kā mausam

dayār-e-jāñ meñ baḌī der meñ ye baat khulī
mirā vajūd hī ḳhud nañg dost-dārī thā

ham ko pahchān ki ai bazm-e-chaman-zār-e-vajūd
ham na hote to tujhe kis ne sañvārā hotā