Tags-Wajood

maiñ apne jism ke andar na dafn ho jā.ūñ
mujhe vajūd ke girte hue makāñ se nikāl

vajūd ko jigar-e-mo'tabar banāte haiñ
alam pe haath to nezoñ pe sar banāte haiñ

ye shab mire vajūd pe yuuñ TuuT paḌtī hai
jaise koī balā ho ki aaseb ho ki qahr

duniyā kā ġham hī kyā ġham-e-ulfat ke sāmne
bātil hai be-vajūd haqīqat ke sāmne

ḳhvāhishoñ ḳhvāboñ kā paikar hī sahī merā vajūd
ik sitāre kī haqīqat kyā bujhā raushan huā

yahī tilism thā 'zarrīñ' jise na toḌ sakī
vajūd us kā to taqdīr ke bhañvar meñ rahā

vajūd par inhisār maiñ ne nahīñ kiyā thā
ki ḳhaak kā e.atibār maiñ ne nahīñ kiyā thā

tirā vajūd gavāhī hai mere hone kī
maiñ apnī zaat se inkār kis tarah kartā

mirā vajūd to ab tak sahī salāmat hai
havā meñ ḳhaak ye uḌtī hai kū-ba-kū kis kī

ḳhudā kī ḳhamoshī meñ shāyad ho us kā vajūd
zamāna huā naam apnā pukāre hue

mirā vajūd jo patthar dikhā.ī detā hai
tamām umr kī shīshagarī kā hāsil hai

āñdhiyoñ kī zad meñ hai merā vajūd
aur maiñ dīvār kī tasvīr huuñ

tire ġhayāb kī ḳhidmat meñ saarā merā qusūr
vajūd phir bhī vahī ġhair-hāzirānā mirā

latīf pardoñ se the numāyāñ makīñ ke jalve makāñ se pahle
mohabbat ā.īna ho chukī thī vajūd-e-bazm-e-jahāñ se pahle

misāl-e-vaqt meñ tasvīr-e-sub.h-o-shām huuñ ab
mire vajūd pe chhā.ī hai shab tumhārī tarah

ek din ġharq na kar de tujhe ye sail-e-vajūd
dekh ho jaa.e na paanī kahīñ sar se ūñchā

kisī ḳhayāl kā koī vajūd ho shāyad
badal rahā huuñ maiñ ḳhvāboñ ko tajraba kar ke

hazār baar janam bhī liyā to kyā 'ash.har'
mirā vajūd bichhaḌtā chalā gayā mujh se

miTTī thā aur duudh meñ gūñdhā gayā mujhe
ik chāñd ke vajūd meñ gūñdhā gayā mujhe

faash na kar sakā koī raaz tire vajūd kā
faash mujhe jo kar diyā faash ye raaz ho gayā