Tags-Wada

ai fanā merī mayyat pe kahte haiñ vo
aap ne apnā va.ada vafā kar diyā

ummīd to bañdh jaatī taskīn to ho jaatī
va.ada na vafā karte va.ada to kiyā hotā

vāda-ḳhilāfiyoñ se terī hai dil meñ shub.ha
hove jo hashr meñ bhī dīdār hai ta.ajjub

ohde-dāroñ meñ bhī ḳhushbū hai hasīnoñ kī sī
va.ada kar lete haiñ aur saaf mukar jaate haiñ

hamāre Dūbne ke baad ubhreñge na.e taare
jabīn-e-dahr par chhaTkegī afshāñ ham nahīñ hoñge

ai dil-e-va.ada-talab phir koī tajvīz-e-vafā
ik nazar aur bhī tā.īd-e-nazar hone tak

jise karnā ho koī vāda-vafā
to vo phir lauT kar bhī aatā hai

va.ada thā hamīñ se lab-e-bām aane kā honā
saaye kī tarah se pas-e-dīvār hamīñ the

har va.ada jaise harf-e-ġhalat thā sarāb thā
ham to nisār-e-jur.at-e-inkār ho ga.e

va.ada jo thā nibāh kā tum ne vafā nahīñ kiyā
ham ne to aaj tak tumheñ dil se judā nahīñ kiyā

vahī mahshar vahī milne kā va.ada
vahī būḌhā bahānā chal rahā hai

maiñ kisī va.ada-farāmosh kā ā.īna huuñ
merī āñkhoñ meñ abhī us kī jhalak baaqī hai

aao mil lo shab-e-va.ada aa kar
sub.h tak phir ḳhudā jaane kyā ho

jo tū ne hazāroñ va.ade kiye lekin vo kabhī iifā na hue
dil hī haiñ rahe armān mire ai va.ada-shikan but hīla-gire

kahtā huuñ ki bosa bhī milā jaan bhī paa.ī
va.ada na karo ḳhair ināyāt tumhārī

kiyā thā ham ne campus kī nadī par ik hasīñ va.ada
bhale ham ko paḌe marnā mohabbat mar nahīñ saktī

ye jāntā hai ki va.ada-shikan hai vo phir bhī
dil us ke vāda-e-fardā pe shaad kitnā hai

tum un ke va.ade kā zikr un se kyuuñ karo 'ġhālib'
ye kyā ki tum kaho aur vo kaheñ ki yaad nahīñ

jānte the donoñ ham us ko nibhā sakte nahīñ
us ne va.ada kar liyā maiñ ne bhī va.ada kar liyā

va.ada thā jis kā hashr meñ vo baat bhī to ho
ye sun ke kis adā se kahā raat bhī to ho