Tags-Teer

tujh ko ma.alūm nahīñ tiir chalāne vaale
said hote hue dekhe haiñ shikārī ham ne

vo tiir kyā jo kisī ko na kar sake bismil
nigāh-e-nāz vo kyā hai jo dil ke paar na ho

tishna-lab rakkhā thā jis ne asġhar-e-ma.asūm ko
ḳhuun kī būñdeñ hameñ us tiir se miltī to haiñ

nazar ko tiir kar ke raushnī ko dekhne kā
salīqa hai hameñ bhī zindagī ko dekhne kā

tire tīr-e-hadaf kī havas thī mujhe baḌī hasrat-e-kunj-e-nafas thī mujhe
mujhe chuuk kiyā ye ġhazab ye sitam na asiir kiyā na shikār kiyā

ek hī tiir hai tarkash meñ to ujlat na karo
aise mauqe pe nishānā bhī ġhalat lagtā hai

shikār kar liyā saarā jahāñ shikār-andāz
huā hai paar nigah se tirī nigāh kā tiir

javānī aa ga.ī dil chhedne kī baḌh ga.iiñ mashqeñ
chalānā aa gayā tīr-e-nazar āhista āhista

qatl na hogā tum se merā maiñ apnā hī dushman huuñ
aag lagā do bandūqoñ meñ pheñko tīr-kamānoñ ko

tīr-e-nigāh-e-yār kā kyā hogā toḌ jab
siine ke paar yaar kā paikāñ nikal gayā

siine se tīr-e-yār kā paikāñ nikal gayā
afsos ghar meñ aan ke mehmāñ nikal gayā

tum apnā tīr-e-adā merī ruuh meñ DhūñDo
in abaruoñ kī lachaktī huī kamāñ meñ nahīñ

hamī sher likhte haiñ tīr-o-neza kī nok par
hamī sar-phire haiñ baġhāvatoñ ke asiir haiñ

kamāñ se nikal jo mire dil meñ aayā
vo tīr-e-nazar kā nishāna tumhārā

jis lahje ko bhī jhuThlāyā haath meñ us ke ḳhaak lagī
jis abrū tak haath baḌhāyā ham ne us ko tiir kiyā

sīdhī nigāh meñ tirī haiñ tiir ke ḳhvās
tirchhī zarā huī to haiñ shamshīr ke ḳhvās

havā na jaane kahāñ le ga.ī vo tiir ki jo
nishāne par bhī na thā aur kamān meñ bhī na thā

tīr-e-mizhgāñ chale judā dil par
ġhamza-e-yār ne judā kī choT

tū ne adā se dekh kar majbūr kar diyā
tīr-e-nigāh dil ke mire ār-pār hai