Tags-Asbaab

asbāb-e-ġham-e-ishq baham karte raheñge
vīrāni-e-daurāñ pe karam karte raheñge

haTtā nahīñ tasavvur-e-asbāb-o-mulk-o-māl
kānoñ meñ baj rahī hai vo shahnā-e-lucknow

kyuuñ ba-har-lamha bikhartā hai yaqīñ kā paikar
tanz o tashkīk ke asbāb bil-āḳhir kyā haiñ

ittifāqāt ke pīchhe bhī haiñ asbāb-o-ilal
ik na ik apnā sabab dast-e-qazā ne rakkhā

tum zād-e-safar itnā uThāoge kahāñ tak
asbāb meñ ik rañj-e-masāfat bhī bahut hai

chale jā.eñge sab asbāb hairānī na jā.egī
kisī sūrat dil-o-jāñ kī ye arzānī na jā.egī

yahī bahut the mujhe naan o aab o sham.a o gul
safar-nazhād thā asbāb muḳhtasar rakkhā

na māya-e-duniyā hai na kuchh diin kā asbāb
mujh be-sar-o-pā kā sar-o-sāmān vahī hai

vo pichhlī mohabbat meñ mire dil kā ḳhasāra
asbāb-e-darūñ vo kabhī pūchhā nahīñ kartā

palkoñ se apne bhūle hue ḳhvāb bāñdh leñ
jab Thaan lī safar kī to asbāb bāñdh leñ

minhā kuchh aise apnī hī tahrīr se hue
jo bach rahā hai ab vahī asbāb bāñdh leñ

kyuuñ nahīñ chhoḌtī āḳhir mujhe duniyā-dārī
māl-o-asbāb se aage bhī kahīñ jaanā hai

asbāb-o-zād-e-rāh tale dafan ho gayā
pahne thā jo bagūle vo lashkar hī aur thā

vahshateñ aisī alamnāk natā.ej meñ milīñ
jin ke imkān pe asbāb kī chīḳheñ niklīñ

asbāb to ban hī jaate haiñ taqdīr kī zid ko kyā kahiye
ik jaam to pahuñchā thā ham tak ham jaam uThānā bhuul ga.e

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

muhayyā sab hai ab asbāb-e-holī
uTho yaaro bharo rañgoñ se jholī

abhī aa jā.eñge le kar sabhī asbāb mahshar ke
maiñ yūñhī pūchh baiThā thā javānī kis ko kahte haiñ

asliyat dekh mire chāk-e-garebāñ pe na jā
ishq chāhe to bahut sāhab-e-asbāb bhī hai