Tags-Shaheed

sab hue hasrat-o-armāñ to shab-e-ġham meñ shahīd
rah gayā ik ye gunahgār abhī baaqī hai

koī usuul mirā matmah-e-nazar to rahā
shahīd-e-hasrat-e-nākām ho gayā to kyā

aao mere mazār par bhī kabhī
kushta-e-nāz kyā shahīd nahīñ

bas ek harf-e-baġhāvat zabāñ se niklā thā
shahīd ho ga.iiñ kitnī rivāyateñ mat pūchh

maut jis kī hayāt ho 'fānī'
us shahīd-e-sitam kā mātam kyā

shahīd haiñ ham hameñ kabhī raftagāñ na samjho
na jaane kab se ajal ko Taale paḌe hue haiñ

shahīd hone kī ye tamannā na dil se niklegī dekh lenā
uThā.e ḳhanjar vo haath meñ kyā na yaar sambhle jab āstīñ kā

dāġh-e-rabt-e-ham haiñ ahl-e-bāġh gar gul ho shahīd
laala chashm-e-hasrat-ālūd-e-charāġh-e-kushta hai

din shahīd-e-nāz kā kis kis jagah hai jalva-rez
kuchh hai shafaq meñ aur kuchh shāmil hai lāla-zār meñ

kyuuñ dar-pai-e-talāsh haiñ ahbāb-o-aqrabā
'parvīñ' shahīd-e-nāz ko qātil se kyā ġharaz

vahī ḳhūn-e-shahīd-e-nāz ab barbād hotā hai
rahā ban kar jo tere haath meñ rañg-e-hinā barsoñ

tere qatīl-e-ġhamza ko tan thā vabāl-e-jāñ
tere shahīd-e-nāz ko sarbār dosh thā

salām merā 'azīm' un shahīd bachchoñ ko
jo apnī jiit kī ḳhātir bhī jaan haare ga.e

shahīd-e-ishq kī ye maut hai yā zindagī yārab
nahīñ ma.alūm kyuuñ bajtī hai shahnā.ī ka.ī din se

baaġh siiñ gulchīñ chalā tab bulbuloñ ne ġhul kiyā
hazrat-e-gul kuuñ kiyā jaatā hai ye kāfir shahīd

kahīñ chāk-e-jāñ kā rafū nahīñ kisī āstīñ pe lahū nahīñ
ki shahīd-e-rāh-e-malāl kā nahīñ ḳhūñ-bahā use bhuul jā

koī baaqī nahīñ tilism-e-jamāl
ishq vaale shahīd ho ga.e kyā

qātil o zālim dar-e-jannat pe mañDlāne lage
arz-e-pakistan se kitne shahīd aane lage

ek din jannat meñ bolā ik shahīd-e-haq-shanās
maslak-e-haq par nahīñ hai merī jannat kī asaas

phir shahīd-e-haq ye bolā ai ḳhuda-e-zul-jalāl
ālam-e-arvāh se ja.alī shahīdoñ ko nikāl