Tags-Sad

sub.h-dam hai ye tabī.at kaisī
ḳhair udāsī se shikāyat kaisī

qarnoñ kī ḳhamoshī ko hasrat hai sail-e-bayāñ ban jaane kā
sadiyoñ kī udāsī ko zid hai ik nutq-e-javāñ ban jaane kā

ye log mujh se udāsī kī vaj.h pūchhte haiñ
batā chukā huuñ tirā naam ik jahān ko maiñ

ban ke ḳhushbū kī udāsī rahiye dil ke baaġh meñ
duur hote jā.iye nazdīk aate jā.iye

ik udāsī mirī dahlīz pe baiThī hogī
ek jugnū mire kamre meñ bhaTaktā hogā

na sarv meñ vo ġhurūr-e-kashīda-qāmatī hai
na qumriyoñ kī udāsī meñ kuchh kamī aa.ī

udāsī joñk hai ye ḳhuun chuus letī hai
ye baat maiñ ne kahīñ aur bhī sunī huī hai

ghuTan taḌpan udāsī ashk rusvā.ī akelā-pan
baġhair in ke adhūrī ishq kī har ik kahānī hai

bahut sharīr thā maiñ aur hañstā phirtā thā
phir ik faqīr ne de dī duā udāsī kī

shajar ne pūchhā ki tujh meñ ye kis kī ḳhushbū hai
havā-e-shām-e-alam ne kahā udāsī kī

sukūt-e-shām meñ gūñjī sadā udāsī kī
ki hai mazīd udāsī davā udāsī kī

isī umiid pe āñkheñ barastī rahtī haiñ
ki ek din to sunegā ḳhudā udāsī kī

vo imtizāj thā aisā ki dañg thī har aañkh
jamāl-e-yār ne pahnī qabā udāsī kī

bahut dinoñ se maiñ us se nahīñ milā 'fāris'
kahīñ se ḳhair-ḳhabar le ke aa udāsī kī

charāġh-e-dil ko zarā ehtiyāt se rakhnā
ki aaj raat chalegī havā udāsī kī

zarā sā chhū leñ to ghanToñ dahaktī rahtī hai
hameñ to maar ga.ī ye adā udāsī kī

umūr-e-dil meñ kisī tīsre kā daḳhl nahīñ
yahāñ faqat tirī chaltī hai yā udāsī kī

dil-e-fasurda ko maiñ ne to maar hī Daalā
so maiñ to Thiik huuñ ab tū sunā udāsī kī

jise na merī udāsī kā kuchh ḳhayāl aayā
maiñ us ke husn pe ik roz ḳhaak Daal aayā

sau gulistāñ jis udāsī par nisār
mujh ko vo afsurdagī darkār hai