Tags-Raushni

ai raushnī kī lahr kabhī to palaT ke aa
tujh ko bulā rahā hai darīcha khulā huā

raushnī mujh se gurezāñ hai to shikva bhī nahīñ
mere ġham-ḳhāne meñ kuchh aisā añdherā bhī nahīñ

raushnī aisī ajab thī rañg-bhūmī kī 'nasīm'
ho ga.e kirdār mudġham kirshn bhī rādhā lagā

sirāt-e-husn-e-talab meñ mujh ko añdherī rātoñ kā ġham nahīñ hai
tirī mohabbat kī raushnī meñ qadam maiñ apnā baḌhā rahā huuñ

raushnī apnī shabāhat hī bhulā de na kahīñ
apne sūraj ke sirhāne mirā saaya rakh de

aa.ī na thī kabhī mire lafzoñ meñ raushnī
aur mujh se ye kamāl tujhe dekh kar huā

jī sulagne kā dhuāñ ḳhat meñ na thā
raushnī harf-e-zabānī meñ na thī

kyuuñ jaage hue shahr meñ tanhā hai har ik shaḳhs
ye raushnī kaisī hai ki saaya bhī judā hai

yak-ba-yak har raushnī kā Duub jaanā aur phir
āsmāñ par ik tilsm-e-sīm-o-zar kā jāgnā

phailī huī thī jis ke taqaddus kī raushnī
āñkheñ talāsh meñ haiñ vo āñchal kahāñ gayā

añdherā dekhnā ḳhud le ke aa.egā diyā merā
kisī din raushnī 'sāgar' isī āñdhī se niklegī

kyā nazar aa.egā abhī ham ko
yak-ba-yak raushnī meñ aa.e haiñ

tirī duz-dīda-nigāhī kā ḳhayāl aate hī
dil meñ ik raushni-e-kashf-e-hijābāt huī

nahīñ ghaTtī mirī āñkhoñ meñ tārīkī shab-e-ġham kī
ye taare raushnī apnī abas barbād karte haiñ

ham ne barsoñ jigar jalāyā hai
phir kahīñ dil meñ raushnī kī hai

āshiyānoñ kī ḳhair ho yārab
sahn-e-gulshan meñ raushnī sī hai

maiñ harf dekhūñ ki raushnī kā nisāb dekhūñ
magar ye aalam ki Tahniyoñ par gulāb dekhūñ

ajab kyā hai rahe us paar bahte jugnuoñ kī raushnī tahlīl kī zad meñ
havā-e-be-vatan rakh le tulū-e-mahr kā ik zā.icha zambīl kī zad meñ

phir aage marhale tai ho raheñge himmat-e-dil se
jahāñ tak raushnī hai ḳhauf-e-tārīkī vahīñ tak hai

raushnī hai usī ke chehre kī
vo jo ik māhtāb dil meñ hai