Tags-Raushni

hāthoñ se chhū ke pahle ujālā kareñ talāsh
jab raushnī na ho to nigāhoñ se bhī ho kyā

yuuñ dushmanī bhī chaltī hai ab dostī ke saath
jaise añdherā rahtā hai har raushnī ke saath

is dā.era-e-raushni-o-rañg se aage
kyā jāniye kis haal meñ bastī ke makīñ haiñ

nigāhoñ meñ na.e andāz se phir raushnī hogī
jab ug aa.egā zehnoñ meñ hamāre ik nayā sūraj

bujhā ke rakh gayā hai kaun mujh ko tāq-e-nisyāñ par
mujhe andar se phūñke de rahī hai raushnī merī

sub.h kā nayā sūraj kuchh to raushnī legā
shaam se jalāyā hai aas kā diyā ham ne

ġhubār-e-ishq se hastī ko bharne vaalā huuñ maiñ
ye raushnī to sar-e-chāk dharne vaalā huuñ maiñ

vo sab charāġh ki thī jin meñ raushnī kī ramaq
bujhā diye ga.e bastī meñ shaam se pahle

shukr hai tārīk dil meñ raushnī ke vāste
go tasavvur meñ sahī us kā jamāl aatā rahā

hameñ to shām-e-ġham meñ kāTnī hai zindagī apnī
jahāñ vo haiñ vahīñ ai chāñd le jā raushnī apnī

kahīñ se koī kiran hī na aa sakī varna
ye tīrgī kā khañDar raushnī se bhar jaatā

duniyā pe apne ilm kī parchhā.iyāñ na Daal
ai raushnī-farosh añdherā na kar abhī

tire falak hī se TūTne vaalī raushnī ke haiñ aks saare
kahīñ kahīñ jo chamak rahe haiñ hurūf merī ibāratoñ meñ

raushnī kī agar tamannā hai
zulmat-e-shab pe vaar kar pahle

ye ek saaya ġhanīmat hai rok lo varna
ye raushnī ke badan se lipaTne vaalā hai

ye mere ghar ke darīchoñ meñ raushnī kaisī
yahāñ charāg kā kyā silsila nikal aayā

merī ḳhātir kuchh sunahrī sāñvlī miTTī bhī thī
varna us kā jism saarā raushnī kā ḳhvāb hai

ye nujūm haiñ mirī uñgliyāñ ye ufuq haiñ merī hatheliyāñ
mirī por por hai raushnī kaf-e-kahkashāñ mirā haath hai

ik chāñd tīrgī meñ samar raushnī kā thā
phir bhed khul gayā vo bhañvar raushnī kā thā

zarre ko āftāb banāyā thā ham ne aur
dhartī pe qahr shām-o-sahar raushnī kā thā