phir ek baar tirā tazkira nikal aayā
mujhe tarāshā to paikar tirā nikal aayā
ye mere ghar ke darīchoñ meñ raushnī kaisī
yahāñ charāg kā kyā silsila nikal aayā
jo naqsh naqsh asīrī kā sehr jānte the
un ā.īnoñ se bhī saayā mirā nikal aayā
maiñ apne shor meñ kab tak dabā huā rahtā
sadā.eñ detā huā be-sadā nikal aayā
lipaT ke rotā rahā vo bujhe charāġhoñ se
ki taaq taaq koī silsila nikal aayā
diyā thā jis ko zamāne ne tere qurb kā naam
mire hī qadmoñ se vo fāsla nikal aayā